Ni Cyrus M. Garde
Syudad sang BACOLOD – Wala na sang kabuhi sang nasapwan ang 17-anyos nga lalaki matapos nga nakoryente sa piggery sa Brgy. Central Tabao, Valladolid, Negros Occidental mga alas-6:10 ang takna kahapon sang aga.
Sunu kay Chief Insp. Luisito Acebuche, hepe sang pulis sa Valladolid, gina-usisa pa nila kon kawatan gid man ang napatay nga si Jello Narte Dionisio, pumoluyo sang amo man nga barangay.
Nahibaluan nga nakita si Dionisio nga patay na sa gwa sang piggery nga ginapanag-iyahan ni Vic Nacional, 53.
Nakita sa kamot sini ang sunog tuga sang iya pagka-koryente.
Sunu naman sa pahayag ni Nacional, madugay na niya ginabutangan sang koryente ang palibot sang iya piggery. Gindugang niya nga sang nagligad nga inadlaw, 50 ka bilog nga pato ang nadula sa iya piggery.
Siling pa gid niya nga sang nagligad nga binulan, may mga baboy man sia nga nadula rason nga iya ginbutangan sang “live wire” ang palibot sang iya piggery.
Samtang ginasulat ini nga balita, ginalantaw pa sang mga awtoridad kon may salabton ang tag-iya sang piggery sa pagka-koryente sang biktima, bangod ang paghimu sini supak sa kasugoan.
Wala man ginreport kon may gwardiya nga ginbutang agud magbantay sa amo nga piggery./H
