MADAMO ang luyag maghalintulad sang 1986 Edsa People Power Revolution sa ginhiwat nga People Power sa mga pungsod sang Nepal kag Indonesia.
Daku ugaling ang pagkatuhay sang Edsa sa ginhiwat nga People Power didto sa Nepal kag Indonesia, although pareho nga gingamit diri ang ultimate nga gahom sang mga pumuluyo bilang Supreme Sovereign, nga labaw kag labi pa sa gahom sang gobyerno nga ginatugyanan lang sang mga pumuluyo agud magtrabaho para sa ila kaayuhan.
Isa ato ka prayer rally kag nonviolent nga mass-up sa Edsa Road sa Quezon City sang mga pumuluyo nga nakatipon sa sulod sang apat ka adlaw (Pebrero 22-25, 1986) sang mga duha ka milyon ka pumuluyo agud iduso ang protesta batok sa peke nga pagdaug ni anay Presidente, turned Dictator, Ferdinand Marcos Sr. sa Pebrero 7,1986 nga Snap Election nga ginmanipular sang Marcos-controlled Comelec.
Taliwas ato sa tally sang NAMFREL, nga sa madugay nga tinuig ginsaligan sang mga pumuluyo agud magpagwa sang honest result sa eleksyon. Ang isip sang balota sang NAMFREL nagpakita sang pag-abanse ni Cory Aquino sing mga 800,000 ka boto batok kay Marcos.
Gn-updan ining non-violent rally sang nagakalain-lain nga mga sektor sang sosyedad – sang mga estudyante, propesyonal, mga tigbatas kag mga obrero, kag mga religioso sa pagpanguna ni Catholic Cardinal Sin – sa ila man pagpati sa kamatuoran sang pagdaug ni Cory sa Snap Election.
Tubtub napapati man sang grupo ang armadong kusog (military) nga si Cory gid ang nagdaug, nga dayon nangamot agud palayason si Marcos kag iya pamilya, nga natabo sadtong Pebrero 26 sang magpalagyo na sila sa Hawaii.
***
On the other hand, liwan ang natabo sa paghiwat sang People Power sa Nepal kag Indonesia, nga ginpangunahan sang mga pamatan-on (Gen Z generation) didto. Sa panugod pa lang nangin magamo na ang ila ginhiwat nga mga march-rally batok sa gobyerno sa isyu sang kapiut sang pangabuhi, korapsyon sa gobyerno, kag pag-ipit sang kahilwayan sa komunikasyon (ban of social media sa Nepal) sang mga pumuluyo.
Madamo ang nasaktan kag nagkalamatay samtang ginpanunog sang mga nagaprotesta ang mga government building, mga salakyan kag mga puluy-an sang mga opisyales sang gobyerno. Ang masakit pa kay samtang ginasunog ang puluy-an sang Prime Minister sang Nepal, nadakpan nila ang asawa sini kag ginpulihan sakit nga wala na sing kabuhi sang gindul-ong sa ospital.
Madasig nga nagdaug ang mga nagaprotesta sa Nepal kag natukod dayon ang interim nga gobyerno sa pagpanguna sang retirado nga Chief Justice.
Maabtik naman naka-react ang gobyerno sang Presidente sang Indonesia kag nag-imponer sang crackdown sa mga nagaprotesta. Ginlupot sa prisuhan ang mga nadakpan. Meantime, at presstime, nagkalma anay ang pagprotesta tungod sining crackdown kag samtang ginpatuman ang pila ka reporma nga ginapangayo sang mga nagaprotesta.
Samtang sa Metro Manila nag-protest rally man ang mga studyante sang UP kag pila ka grupo nga nagapanawagan sang maabtik nga aksyon agud pasabton ang mga na-involve sa anomaliya – mga opiyales sang DPWH, mga contractor, kag mga kongresista nga may palpak nga flood control project sa ila distrito, lakip na ang pila ka senador.
Well, si Presidente Marcos Jr. mismo ang nag-ungkat sang problema nga ini sa iya SONA sadtong Hulyo 28 kag nagmando sang imbestigasyon sang isa ka masaligan nga Independent Body nga posible pangunahan ni retirado nga police officer kag Baguio City Mayor Benjamin Magalong.
Suportado man ining pagpa-imbestigar sa sining anomaliya sa flood projects sang mga retirado nga mga opisyales sang AFP sa ila manifesto nga nagapakamalaut sining anomaliya nga ginaugyunan man sang Dept. of National Defense kag bug-os nga pwersa sang AFP.
***
Gaupod kita sa paghatag sang suporta sa imbestigasyon sang Independent Body nga itukod sang Presidente, nga lakip man seguro sang parallel investigation sang Senate Blue Ribbon Committee nga ginapamunuan ni Senado Panflo Lacson, nga gapabilin nga wala nalamita sa ining anomaliya.
Napamatud-an naman sang gobyerno ang mahimo sang kasubong nga imbestigasyon sa pagkapabilanggo sang Queen of Pork Barrel nga si Janet Napoles sang 100 gid ka tuig, although wala ginkalipay sang madamo ang pagpamatbat sa kaso sang duha ka senador.
Wala man kita gaupod sa panawagan sang pila ka nagalider-lider sa mga protesta sa ila panawagan sa mapintas nga klase sang People Power nga ginhiwat sa Nepal kag Indonesia. Gasuporta lang kita sa non-violent nga mga protesta bisan galab-ut pa sa kadamuon sang nonviolent kag bloodless 1986 People Power Revolution, pero indi kasubong sing kapintas sang People Power sa Nepal kag Indonesia.
Tagaan ta anay sing oportunidad ang imbestigasyon sang Independent Body nga ginatukod sang Presidente kag ang parallel investigation sang Senate Blue Ribbon Committee.
Basi mapatigayon man nila sing mabungahon ining ila imbestigasyon nga indi kinahanglan mapadugay sang indi nagakabagay sa tindug nga “Justice delayed is justice denied”, kag “Injustice anywhere is Injustice everywhere.”
Indi lahog-lahog ang maka-experyensya sang crackdown labi na gid kon ma-imponer na ang martial law bisan sa sulod lang sang 60 ka adlaw nga ginatugot ang aton 1987 Constitution. Ask me kag ang iban pa nga naka-experyensya sini. Gani, relax lang anay kita! Okey?/PN
