[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’ASSISTANT PRINCIPAL GINPATAY SA MAASIN’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni Ime Sornito
[/av_heading]
[av_textblock size=” font_color=’custom’ color=”]
Thursday, March 23, 2017
[/av_textblock]
[av_textblock size=” font_color=” color=”]
Syudad sang ILOILO – Wala na sang kabuhi sang nasapwan nga nagakulob kag duguon ang assistant principal sang Cabatuan National Comprehensive High School sa katubohan sa higad sang dalan sa Barangay Naslo, Maasin, Iloilo alas-5:10 sang aga kahapon.
Ginkilala ang biktima kay Dante Roldan y Giminez, 59, anyos, soltero kag residente sang Dalan Serrano, Cabatuan, Iloilo, nga ginapahayag man isa ka agi.
Nakaagom ini sang tatlo ka mga pilas sa likod sang ulo tuga sang paglampos sang dalagku nga mga bato.
Sa interbyu sang Panay Balita kay Inspector Menrico Candaliza, hepe sang Maasin Municipal Police Station (MPS), nasapwan ang biktima sang naga-jogging nga barangay kagawad nga si Juan Subang sang Brgy. Cahigon, kaiping sang Brgy. Naslo.
Nagapati man si Candaliza nga posible gin-ila ukon gin-agda sang indi magnubo sa tatlo ka mga suspetsado ang biktima nga magkadto sa Maasin.
Bangod nga ma-inabyanon sa mga lalaki, posible nga nag-upod ang biktima tubtob nga nakalab-ot sila sa Brgy. Naslo.
Daku man ang pagpati ni Candaliza nga plano na sang mga suspetsado nga hold-apon ang biktima bangod nga wala makita ang kahita, relo kag cellphone sini sang nasapwan ang iya bangkay.
May teoriya man ang hepe nga posible nagbatu ang biktima sa mga suspetsado ukon nagpamalibad nga maghatag sang kwarta rason nga ginlamposan.
“Ang akon theory robbery kay siempre agi man bala si sir nga ni. Basi bala gindala sang kabataan, nag-upod sa mga kabataan, ginganoy kay way na wallet, way man kwarta, ti robbery. Ngaa ginlamposan pa sang bato,” eksplikar ni Candaliza.
Narekober man sa ginluntaran sang insidente ang tatlo ka daku nga mga bato nga may tinulo pa sang dugo.
“Wala man. Head injuries lang gid. Tatlo ka bato ang narekober sa scene pero more than three ang perpetrators,” dugang sang hepe.
Wala man ginadula sang hepe ang posibilidad nga tumandok sang Maasin ang mga suspetsado bangod nga saulado sang mga ini ang nahinambitan nga barangay.
Natukiban man nga wala sang puersa nga natabo sa pagdala sa biktima sa Maasin matapos nga nakit-an pa ini alas-otso sang Martes sang gab-i nga naga-inom sang isahanon sa kandingan sa Cabatuan.
“Basi nga taga-Maasin ang suspek ukon ginsakay sia sa motorsiklo kag gindala sia di para himuon nila nga plano eh nga kwartahan, basi nagbatu ukon way man sia kwarta. Kay last time, nakita pa sia nga naga-inom sa kandingan sa Cabatuan,” dugang ni Candaliza.
Sa interbyu naman sang mga katapo sang media kay Mr. Valentine Lauro, principal III sang Cabatuan National Comprehensive High School, ginsiling sini nga mabuot nga sahi sang manunudlo si Roldan kag masobra na 30 anyos nga nagaserbisyo sa ila eskwelahan.
“Actually mabuot na si sir Roldan kay nakaagi man gani sia principal before ako diri gin-assign tapos department head man sia sang Araling Panlipunan. Tapos pag-assistant principal niya sia in-charge sang junior high school. Nami na sia kag malaam. Malawig na, mga more than 30 years na sa Cabatuan high school,” laragway sang principal sa iya assistant.
Sang Martes man sang hapon ang ulihi nila nga pagkit-anay sang biktima kag wala man sia sang nakita nga pinasahi sa hulag sini.
Kaangay sang Maasin MPS, nagapati si Lauro nga posible ginhold-ap ang biktima.
“Daw indi pa gid ako maka-establish kay gina-imbestigar pa. Pero isa sina kay wala na sia wallet kag cellphone basi gin-ano sia eh, ginhold-ap sia,” dugang ni Lauro.
Angut sini, naghinyo ang principal sa mga suspetsado nga magsungka na.
“Siguro may Diyos man ang kalibutan. Bisan diin kamo magkadto, man-an man ran kag ma-trace man sa gihapon. So, better kon mag-surrender lang gid sanda para mabal-an ta gid kon ano gid ang gin-agrabyo nila insat ginpatay gid nila si sir Roldan,” pagtapos ni Lauro./PB
[/av_textblock]
[/av_one_full]
