Madinuagon kag madinalag-on ang LIGA DAY 2025 celebration sang Liga ng mga Barangay sa Pilipinas – Iloilo Chapter, nga ginapangunahan ni Hon. Amalia Victoria F. Debuque, LNB – Iloilo Provincial President, nga ginhiwat sa Iloilo Sports Complex sang tinalikdan nga adlaw, Agosto 24.
Kaupod ang pwersa sang 13,300 ka barangay officials sang probinsya, ini ang pinakadako nga pagtililipon sang mga opisyales sang kabarangayan, nga nagalaum nga mas pabakuron ang pag-inupdanay kag pag-amliganay sang barangay officials.
Nagtambong sa nasambit nga selebrasyon ang Liga ng mga Barangay sa Pilipinas National President, Hon. Maria Katrina Jessica G. Dy, kaupod ang iban pa nga miyembro sang ila National Executive Board.
Kaupod man sa selebrasyon si Vice Governor Nathalie Ann Debuque, kag Governor Arthur Defensor Jr. nga nagpabutyag sang ila pagpasalamat sa tanan nga opisyales sang barangay nga ila gid nangin kaupod sa pagpatuman sang mga proyekto sang probinsya para sa tagsa ka banwa.
Isa sa mga nangin highlight sang programa amo ang commitment signing sang Liga Presidents sang tagsa ka banwa, kadungan sa pagpanumpa sang barangay officials nga ila mas pabaskugon ang ila suporta sa adbokasiya sang probinsya angut sa ginaduso nga reporma sa edukasyon, pamaagi sa Bulig Eskwela sang Probinsya (BES Probins) program sa idalum sang MoRProGRes Iloilo.
Sa kabahin sang iya mensahe sa iya nga opening speech, ginhambal ni Amalia Debuque nga apisar tapos na ang ila nga LIGA DAY 2025, wala nagatapos sa amo man nga adlaw ang mga programa kag proyekto sang provincial liga.
Ini bangud padayon gid ang pagpatuman sang iya mga proyekto kaangay sang “Barangay Aid on Wheels” kun sa diin nakig-upod sila sa Integrated Bar of the Philippines kag DILG, agud magdala sang bulig legal kag mas pasangkaron ang kapasidad sang aton kabrangayan.
Isa man sa iya mga proyekto amo ang “Kaibigan mo ang LIGA”, nga nagahatag sang bulig pinansayal para sa BURIAL, MEDICAL kag HOSPITAL nga pangkinahanglanon sang mga opisyales sang barangay sa bug-os nga probinsya.
Para kay Amalia Debuque, iya gid tuyo nga ipalab-ot ang mensahe sa tagsa niya ka barangay official – nga mahimo gid nila masandigan ang ila provincial liga sa tion sang kalipay kag pagpangabudlay.
Iya man ginhingyo ang tanan nga barangay officials nga siguraduhon gid nga maghatag sang mas maayo, masaligan, kag tampad nga serbisyo sa ila sinakpan, kag padayon nga magbinuligay agud mahatag ang nagakaangay nga benepisyo kag serbisyo sa tagsa ka mga Ilonggo.
