[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | KAANGAY SANG SANTERMO’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
Friday, June 2, 2017
[/av_textblock]
[av_textblock size=” font_color=” color=”]
Nagsugod na ang pagpatuman sang Speed Limit Ordinance sang Syudad sang Iloilo. Sa masami, madamo sang reklamo kag indi paghangpanay sa tunga sang mga motorista kag mga traffic aides.
Nakahibalo ang tanan nga maayo ang katuyuan sang ordinansa. Luyag sini nga mabutang sa maayo nga kahimtangan ang mga motorista, ang mga pasahero kag ang mga nagatabok sa dalan paagi sa pagpabahar sang dalagan sang salakyan sa angay nga kadasigon.
Apisar nga madugay na nga napasar ang ordinansa, apang karon lang nakaangkon sang kaisog ang city government nga magpatuman sini. Karon lang nahatagan sang lubos nga tinion nga ipatuman ini kag lantawon ang mangin epekto sa mga mayor nga dalanon.
Bisan ang yara sa transport sector ang wala nagapamalabag sa pagpatuman sini nga ordinansa. Nakita kag nahangpan nila ang katuyuan kag mangin epekto sini sa dalan.
Bisan pa nga nagayamhu sila sa sitwasyon sang Benigno Aquino Jr. Avenue ukon Diversion Road nga indi makapadasig ang salakyan bangud nga madamo sang ginakalkal kag ginatapalan, ilabi pa gid sa bahin sang daku nga mall nga halos naga-igod ang salakyan sa sina nga bahin sang dalan. Nagayuhum sila bangud nga wala sang may makalapas sa ordinansa bangud tuman ka hinay sang ilig sang salakyan.
Ginalauman nga mangin magutok ang dalanon sa pag-amat-amat na sang pagpadulong sang mga estudyante sa syudad bangud sa natalana nga pagbukas sang klase.
Bangud sini, gina-antisipar naman sang mga driver sang jeep nga maga-anaw naman ang mga traffic sa dalan sa pagbantay sa mga magalapas sa ordinansa sang syudad.
Ginapanugyan sang transport sector nga kuntani pahamtangan sang maathag, daku, kag madali makita nga informative signage ang dalan agud nga magiyahan ang mga motorista.
Bangud sa pagpatuman karon sang speed limit ordinance sa Diversion Road, nakita nga balutangog ang pagpatuman sang sini nga ordinansa bangud nga halos indi pa kumpleto ukon kulang sa informative signage sa dalanon.
Ginapangabay sang transport sector nga dapat kumpletuhon ang tanan antes lubos nga ipatuman agud nga malikawan ang baisay sa tunga sang driver kag sang traffic aide.
Ginaduso man sang transport sector nga kuntani butangan sang husto nga lugar ang mga informative signage kag indi paghulagon depende sa kakombenyente sang sin-o man.
Dapat nga indi pag-ibulubalhin ang mga signage sang loading kag unloading areas, kag iban pa nga traffic sign agud nga indi maglisa kag magsala-sala ang mga driver sa pagtuman sang traffic ordinance.
Indi naton mapunggan ang pag-uswag rason nga dapat mangin sibu sa sitwasyon kag tinion ang pagpahamtang sang mga traffic signs, dapat may comprehensibo nga mapa ang TMTRO kon sa diin nga bahin sang dalan mahimo makadulog ang salakyan, kon sa diin makaliko, kon sa diin magabahar kag iban pa nga mga pagsulundan.
Kon mangin tayuyon ang ini nga sistema, makahatag ini sang kapag-on sa ginaduso nga pagbag-o kag pagdisiplina sa mga motorista kag malikawan ang pagbina-isay sa dalan.
Dapat mangin mapatihan kag indi mangin kaladlawan ang syudad sa
pagpatuman sang kasuguan. Ang mga traffic signage indi dapat mangin kaangay sang santermo./PB
[/av_textblock]
[/av_one_full]
