[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | ESPIKULASYON’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
Wednesday, June 7, 2017
[/av_textblock]
[av_textblock size=” font_color=” color=”]
Moderno na ang panahon, madasig ang paglapta sang impormasyon kag halos ginalikupan na kita kag ginabombardiho sang madamo nga impormasyon sa tagsa ka minuto.
Wala sang may nagakatabu sa iban nga duog nga indi maglanog kag makalab-ot sa aton igdulungog.
Mas konektado na ang tanan bangud sa moderno nga teknolohiya. Mas mahapos ang pagpakig-angot sa iban, pagpadala kag pagbaton sang mensahe gikan sa natungdan padulong sa ginatuyo nga padal-an. Gilayon nga mabaton ang sabat. Maathag nga nagahapos na ang tanan kag lunsay gilayon na ang aton maaguman.
Maathag nga tuman ka daku sang benepisyo nga nadulot sa aton sang moderno nga teknolohiya, apang kaangay man sini ang epekto sang paglapta sang sala nga impormasyon.
Madasig man nga mapatalang ang tawo, mapahibalo sang indi husto nga impormasyon, kag mapapati sang indi matuod nga bagay.
Matuod gid man nga ang isa ka bagay may maayo kag may malain nga matuga, depende sa paggamit kag depende sa nagagamit.
Madasig tuod nga makahibalo ang tanan sa nagakatabu, apang madasig man nga mahiluan ang aton paminsaron kag balatyagon sang sala nga balita kag impormasyon.
Kaangay sang natabo sa Resorts World Manila nga insidente. Halos ang tanan nakatalupangod sa paglupok sang balita. Madamo ang nagpamangkot kon ano ang natabo kag madamo man ang gilayon nga naghatag sang ila pang-ino-ino kag panagupnop sa kon ano ang natabo.
Hinali man nga nagbaha ang mga abanse nga panghuna-huna, madamo sang naghimo sang ila kaugalingon nga senaryo, nagdihon sila sang sitwasyon nga ila mismo ginkakulbaan, nakatumar sila sang sala nga impormasyon nga ila ginbasehan sa paghimo sang sayop nga konklusyon.
Bangud sa ila kaugot sa administrasyon, bangud sa ila supak nga pagpati, bangud sa ila emosyunal nga paglantaw sa sitwasyon, sila ang nahulog sa pil-as sang sala nga panan-awan, nasiod sila sa tigalbong sang mga mahilig mag-una sa resulta sang imbestigasyon, sila nga ang tingob nga nahulog sa kumunoy sang sayop nga impormasyon.
Indi malain ang magpamangkot kon ano ang natabu kag kon ano ang ginahimo sang otoridad. Indi sala ang magpahayag sang panan-awan. Ang sala lang kon matabunan sang paghusgar kag maghimo sang konklusyon base sa sala nga impormasyon.
Pamangkuton naton ang aton kaugalingon kon bala ang aton pamangkot kag panghuna-huna ukon opinyon ang makabulig sa pag-alibyo sang sitwasyon, kon bala wala ini sang may matuga nga dugang nga kabalaka ukon dugang nga pagtublag. Makabulig bala ang aton pagtugda sa lakat sang aton pangabuhi? Makabulig bala sa pagpakalma sang sitwasyon? Makabulig bala sa pag-ayo sang aton ekonomiya, kalinong kag katawhay kag masanag nga palaabuton?
Indi tanan nga bulak sa harden mahamot. Indi tanan nga bulong sa botika makapanami sang aton pamatyag. Indi tanan nga likido makabulong sa uhaw sang tawo.
Kita ang mas maalam maglantaw sa kon diin nga impormasyon ang angay naton nga batunon. Kita ang mas nakahibalo kon ano ang mas may maayo nga epekto, kon diin ang matuod kag kon ano ang makabulig sa aton.
Ang pagkonsumo sa impormasyon nagadepende sa aton, apang angay nga likawan ang espikulasyon./PB
[/av_textblock]
[/av_one_full]
