[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’Ang Bakunawa’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”][/av_heading]
[av_textblock size=” font_color=” color=”]
Ika-2 nga gua
NAHAUNA NGA GAB-I
Kasubong linug sa idalum sang dagat nga sarang makabatak sang mga wala pa natukiban nga mga binuhat gikan sa kaidadalman, ang mga island festivals may gahum sa pagtipon sang mga kalandrakas ukon mga butang nga tuhay sang sa iban. Kalabanan sang mga nakatambong sang Bakunawa Festival nagapamatuod nga wala ini sang kaangay diin man.
Nasadsad sa sugilanon sang pagtigbaylo sang bakunawa nga ginlaragway ni Mercedes Luces, ang festival nagahatag rason sa mga dumulu-aw agud hatagan ligwa kag kahilwayan ang ila masupok nga mga pantasya. Ang mga tumandok kag mga pangayaw nagasul-ob sang mga kapritsuso kag makakulunyag nga mga biste nga azul kag berde nga nagalaragway sang bakunawa, ukon bilang pula nga pasayan, ukon bilang mga birhen kag ang ila kahagugma sa pinakaputli nga puti.
Suno sa mga brochure gikan sa Department of Tourism, ang Bakunawa Festival, isa ka kombinasyon sang Mardi Gras kag Halloween. Wala sang nagapahilabot kon ano ang ginasuksok, ukon wala ginasuksok, sang tagsa-tagsa gani ang tanan nga mga transvestites kag yadtong mga mahuyugon magsul-ob sang mga naug, kag yadtong mga maluyagon sa mga masquerade balls kag drag shows, nagadugok gikan sa tanan nga pamusod sang kalibutan para sa extravaganza sang Bakunawa Festival.
Sa una nga gab-i sang festival, tatlo ka hubog nga mga pasayan ang nagbangga kay Mateo sa isa ka makitid nga dalan agud mangilkil sang ilimnon ukon kwarta mga sarang ibakal sang Añejo Rum.
Wala sia sang sarang mahatag, apang nadumduman ni Mateo ang action song nga gintudlo sa iya ni Lola Ceding nahanungod sa tatlo ka pato, gani nagkanta sia sa mabaskug kag matigdas nga tingog:
Tatlo ka pato, ang nakita ko—
Matambok, maniwang, pulu-pareho;
Apang ang isa, ikug naga-alsa
Humlad ang pakpak, kag magkapa-kapa!
Sa ulihi nga nota, gintalikdan ni Mateo ang mga pasayan nga nagbangga sa iya, gintuwaran, kag gin-utotan sila. Nagkilinadlaw ang mga pasayan apang sang nahaklu nila ang utot, nauntat ang ila kalingaw. Gindakup nila si Mateo kag wala ginbuy-an tubtub napasaut nila sia.
Sa nagasigabong nga sonata sang “Limbo Rock” gikan sa sound system, ginsikway ni Mateo ang tanan nga katahap kag gintuman ang naga-isahanon nga pagsulundan sang festival: Dagyang, ukon pahigad!
Sukbit ang gitara kag bitbit sa iya kilid ang knapsack, nagpa-anud si Mateo sa musika, kag nagasaut nga nagpalagyo sa mga nagalagas sa iya.
Ginlamon sia sang ritmo kag pulso sang festival. Kasubong pasayan nga gina-anud sang balud, nagpabaya sia kag nagpautaw-utaw kon diin man nga mga dalanon sia ginadala sang nagasilinadya nga guban. Ang mga kapait sang iya kabuhi, nalimtan—ang mga kasubo sang iya pagkabata, ang iya paglayas bilang tin-edyer, ang mga pagpasimpalad sa mga mapintas nga mga syudad samtang nagapangita sang iya kapalaran, ang mga paglagas sang iya handum sa showbiz.
Sa una nga tion sa madamu nga mga tinuig, ginkalimtan niya ang naglinigad kag nagsakay sia sa balud sang pagkinasadya kasubong sang iban nga mga pasayan sa dagat sang katawhan.
Sa pagtunod sang adlaw sa nahauna nga adlaw sang festival, naga-igpat-igpat nga ambon sang kahulugbon ang nagalupad-lupad sa ibabaw sang nagagilinutok nga baybayon. Ang mga balud sa dagat, kasubong himbis sang bakunawa, naga-idlak-idlak sa kasanag sang bulan. Kon imo mulalungon, ayhan imo mabatian ang ugayong sang bakunawa nga luyag manginpadlos sa iya bilangguan nga tubi.
[/av_textblock]
[/av_one_full]
