[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
NALUMOS SA HAPAW NGA RASON
Mabudlay gid mag-alagad sa pumuluyo ang isa ka tawo kon ang iya balatyagon kag utang nga kabalaslan nahigot sa nagpahamtang sa iya sa posisyon.
Nangin bulag sa kamatuoran, nangin bungol sa lohikal nga rason, kag nagkabus ang panulok sa kon ano ang maayo para sa palaabuton.
Matuod nga indi mapabay-an ni City Tourism Officer Junel Ann Divinagracia ang iya klasmeyt kag abyan nga si Mayor Jed Patrick Mabilog nga nagaagunto sa mga lulukduhon nga problema ukon palaligban nga iya ginaatubang. Kag makita naton nga halos na sia makahibalo magseparar sang rason kag emosyon.
Sa nasiling ko na sadto pa, malawig na nga panahon nga ginbansagan ni Presidente Rodrigo Duterte ang Syudad sang Iloilo kag sa una nga paglawag sini nga madamo ang nagbatyag sang kaluya, kasubo kag pagkabalaka, mismo si Divinagracia ang nagsiling nga wala sang nangin epekto sa industriya sang turismo sa syudad. Ginpabutyag pa sini nga mas nagdamo ang napadulong sa Iloilo bangod sa kuryusidad nga ila lantawon ang lugar nga masami ginasambit sang presidente.
Apang, sang ginbirada na sang presidente si Mayor Mabilog, naglisa ang tono sang argumento ni Divinagracia. Ginsiling sini nga apektado na ang Syudad sang Iloilo bangod sa madamo nga kanselasyon sang natalana kontani nga mga aktibidad nga diri pagahiwaton.
Nag-upod si Divinagracia sa pahayag sang isa ka negosyante nga nakabatyag sang kapaslawan sa ila negosasyon bangod may apat kuno ka mga sinapol nga kontani diri hiwaton ang nagkanselar sa ila sa rason nga gintawag nga “shabulized” ang Syudad sang Iloilo.
Ginpamatian ni Divinagracia ang pahayag ni Gruenberg kag ini ang iya gingamit nga rason sa pagpalapnag sang pahayag nga apektado ang turismo sa syudad.
Ginpamangkot naton kon ano ang balasehan sini, kon may datus nga makapamatuod diri, kag kon pila ang balor sang kabug-osan nga huol nga natuga sa negosyo sa syudad.
Naglipas lang ang panahon apang wala sang maathag nga pahayag. Ginrason nila ang indi rason lamang nga mapapati ang tawo kag makakwa sang simpatiya sa ila kaangay nga mga negosyante.
Nagsalom si Divinagracia sa manabaw nga rason. Nakabunggo ang iya paminsaron, naanod kag ginsapnay sang iya emosyon bangod sa kaluoy nga nabatyagan sa nagakatabu sa alkalde.
Ginhampak sang balud sang kamatuoran ang bato sang kabutigan nga ginpasad sang mga negosyante.
Nagpagwa sang pahayag si Department of Tourism 6 Regional Director Atty. Helen Catalbas nga nagasupak sa pahayag ni City Tourism Officer Junel Ann Divinagracia.
Ginpahayag ni Catalbas nga wala sang malain nga epekto sa turismo sang syudad ang pagbansag ni Presidente Duterte bangod nga ang mga local kag foreign tourists ang nakahibalo sa kon ano nga lugar ang ila ginakadtoan.
Mas naganyat sila nga magkadto sa Iloilo agud nga ila personal nga makita kag mabatyagan kon ano ang sitwasyon sa Iloilo kag kon ano ang yari diri sa aton kon ngaa masami ini nga ginalawag sang pangulo.
Nagakadula ang rason kon malikupan na sang emosyon.
Antes maglumpat dapat tukibon ang kadalumon agud indi malumos sa hapaw nga rason./PB
[/av_textblock]
[/av_one_full]
