[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO ‘BERT’ LADERA
[/av_heading]
[av_textblock size=” font_color=” color=”]
MABUGNAW ANG BAGA
Nagtahaw na ang kainit, wala na sang sungaw nga makapaso. Nag-ugdaw na ang iya kasupog, kaangay sang abo nga napudpod.
Makita ang ini nga sahi sang palaanggiran sadtong Setyembre 21, 2017, ang adlaw nga gindeklara bilang National Day of Protest kag adlaw man sang pagdumdom sang deklarasyon sang martial law.
Kon sadto mainit nga ginabatyag ang kawsa, ginahangop ang tagsa ka punto, kag gina-updan ang singgitan nga nagapanawagan sa gobyerno; nagalantaw na lang karon ang mga tawo, mas ginahangop kon ngaa may nagamartsa sa karsada kag may nagapabatyag sang ila kawsa.
Mahimu nga tuhay na ang sitwasyon sadto nga panahon kag sa karon. Mahimu nga nakahangop na ang tawo sa kon ano ang mga adbokasiya kag mga kabangdanan sa pagmartsa sa dalan. Mahimu nga mas madamo na sang ihibalo ang mga tawo agud makapanilag sa kon ano ang matuod nga kawsa kag katuyian sang ila pagsinggitan sa dalan.
Sa nasiling na, mangin epektibo lamang ang bulong para sa hilanat kon ang nagatumar may yara sang hilanat, apang mangin wala ini sang pulos kon ang ginapainom mapagros.
Tuhay ang mga tawo sadto nga panahon ipaanggid sa karon. Mas madamo sang ihibalo ang karon nga henerasyon angut sa isa ka bagay, mas madali nila matukiban kon sila ang ginaganoy ukon ginapatalang lamang. Mas madali sila makahimo sang kaugalingon nga panindugan paagi sa giya sang kaalam nga ila maangkon paagi sa moderno nga teknolohiya.
Nakahibalo sila kon sila mangin bulag kag guyuron sang kaangay nga bulag, sa pil-as sang kahangag didto sila magahugpaas.
Natingala man ang kadamuan bangud nga sadto pa man tubtub karon isa ka kawsa ang ila ginadala sa pila na ka administrasyon nga naglalabay.
Wala sang kasolbaran ang ila ginayamo, ano ang kasigurohan nga masolbar ini sa sini naman nga pagyamo?
Maathag nga wala sila sang handum nga masolusyunan paagi sa pagpakatig-a sa pagsikway sa solusyon nga ginatan-ay. Kon ila batunon, wala na sila sang rason nga sa pagmartsa magapadayun. Ginagamit nila nga mitsa sa pagmartsa ang mga nagliligad nga sa solusyon ila gindalukan nga mabutang sa kalinong.
Dapat na nga huna-hunaon sang mga naga-adbokasiya nga nagalas-ay na ang isa ka tul-an nga maka-biente ka beses na nga nasabawan.
Nabungol na ang tawo sa singgitan nga wala man sang solusyon nga naaputan. Dapat nga magpaminsar naman ang mahuyugon sa pagmartsa sa dalan kon paano makumbinser ang mga tawo nga hangpon kag updan ang ila adbokasiya.
Kon sadto tuman ka damo sang naga-upod sa ila, karon maisip na lamang kon pila gid ang kadamuon nila.
Mas marot ang ini nga administrasyon nga may kaugalingon nga pagtipon sang tawo paagi sa ila gintukod nga Kilusang Pagbabago. Kahibalo si Presidente Rodrigo Duterte kon ano ang ila padugi, kon ano ang ila iskema, kon ano ang ila palakat agud nga makatipon kag makamartsa.
Ang mga tawo nga ila nahaylo sadto, yara na sa Kilusang Pagbabago. Mas maathag ang ila pagpahangop, mas makita kag mas mabatyagan ang panindugan.
Maluya ang pwersa, mabugnaw ang baga./PB
[/av_textblock]
[/av_one_full]
