SA SEMANA SANTA nga ini ginadumdum sang bug-os nga Katilingban Kristiyano ang pag-antos ni Hesukristo, kamatayon sa krus, pagkabanhaw, pagkayab sa Langit, kag ang lubos Niya nga Kadayawan (exaltation) sa ngalan sang pag-isa Niya sa katauhan sang Diyos Amay kag Diyos Ispiritu agud maluwas ang katauhan sa lubos nga pagpakasala.
Tani matagaan naton sing mabungahon nga kahulugan ining paghanduraw naton sa kabuhi ni Hesukristo sa panahon nga ini agud padayon man nga indi mapulak ang aton pagpakig-unong sa Diyos sa Katubtuban sang Iya Wala Katapusan nga Ginharian. Amen.
***
Nalutos ang aton Rising Star sa global tennis nga si Alex Eala (WTA 31st seed) sa kay WTA 13th seed nga si Karolina Muchova sa Round 4 sang 2026 Miami Open sadtong Marso 23, 2026, kon san-o natapos man ang iya pagpasakop diri.
Apang natabo ato pagkatapos lutoson man ni Alex ang duha ka top seeds sa Round 2 kag Round 3 halin sang iya “bye” sa Round 1.
Bag-o sina, nangin isa na siya ka “Giant killer on the hunt” sugod sadtong Miami Open 2025 sang magsugod man ang iya mga kadalag-an batok sa mga top seeds samtang rank WTA 140 kag wild card gid lang siya sadto.
Nga gin-updan sang halos indi matapos nga paghinugyaw sang iya Army of Pinoy fans kag multi-cultural admirers nga nagapuno sang stadium kon diin man siya nagahampang.
In fact, gindeklarar gid siya nga “Most Popular Tennis WTA Player” sang mga tennis experts kag analysts, kag gnkilala man nga No. 1 sa mga TV ratings.
Naghatag man gani ini sa iya sang daku nga earnings nga galab–ot sa $1.5 tubtub $2 ka Milyon tungod sang mga branding sponsorship, nga wala pa dira labot ang iya dinag-an nga prize money. Tumalagsahon ini nga earnings sang isa ka pro sa una pa lang ka tuig (2025) nga pagpasakop sa mga WTA tournaments.
Sa Miami Open 2025 sadto, ginlutos ni Alex si No. 2 Iga Swiatek, nga former W orld No. 1 halin sa Poland sa quarterfinals sadtong Marso 27, 2025 sa straight sets 6-2, 7-5.
Nagdaug man siya diri batok kay Madison Keys sa Round 32 (Round 3) 6-4, 6-2. Ikaduha sa Top 10 players ining si Keys.
Earlier, ginlutos man gani ni Alex si No. 10 Jelena Ostapenko sa 2nd Round sa tie-breaks sa final scores nga 7-6 kag 7-5. Si Ostapenko isa ka Latvian player nga ranked 130 places higher sangsa kay Alex.
Sa amo nga tion, nangin una na si Alex nga Filipina nga nakalab-ot sa semi-final sang WTA 1000 nga naga-offer sang mas challenging matches. Kag nalakip na siya sa Top 100 sa una nga kahigayunan.
Sa Dubai Duty-Free Tennis Championships (WTA 1000) naman, gindaug ni Alex si No. 5 Jasmine Paolini sang Italy, 6-1 kag 7-6, sa Round 2 kag si Sorana Cirstea sa Round 3.
Nalutos siya kay Coco Gauff (No. 3) diri sa quarterfinals (Round 3) sa score nga 0-6, 2-6 sadtong Pebrero 19, 2026.
Apang wala pa isa ka bulan, sa ila encuentro liwat, ginlutos naman ni Alex si Gauff sa score nga 6-2, 6-0 sa ila Round of 32 match sa Indian Wells (BNP Paribas Open) sa California.
Pagkaligad lang sang lima ka bulan halin sa iya mabungahon nga mga hampang sa Miami Open 2025, si Alex nangin una man nga Filipino nga nagdaug sa main draw Grand Slam match sa Open Era sang ginlutos niya si Clara Tauson sa first Round sang US Open.
Sa nagligad lang nga Miami Open 2026 sang Marso, ginlutos ni Alex si Laura Siegemund sang Germany sa 3 sets sang Round 2, kag si Magda Linette sang Poland sa 3rd Round, 6-3 kag 7-6, nga may mas mataas nga WTA seeding sangsa iya.
Ang masunod nga match ni Alex sa Abril 6-12 naman sa Linz, Austria, kon diin ginalauman gihapon ang daku nga suporta sang iya Army of fans.
First time niya sa paghampang sa clay surface diri, kon diin kinahanglan pa mag-practice anay ni Alex agud maka-adjust. Unlike sang hard (concrete-laid) surface, kon diin nakahampang na si Alex, isa ini ka eco-friendly kag non-toxic nga surface, nga nasampawan sang crushed bricks kag mineral aggregates.
Sa Linz Open, nga isa ka WTA 500 tournament, upod ni Alex diri sa pagpasakop ang mga top tennis players nga sanday Emma Raducanu, Clara Tauson, Jelena Ostapenko, kag ang defending champion nga si Ekaterina Alexandrova. Good luck, Alex!/PN
