NAGPANUGYAN si Senador Robin Padilla sadtong Hulyo 23 sa tion sang padayon nga Impeachment Trial batok kay VP Sara Duterte nga tani ang Prosecution indi One-Sided.
Ngaa, pwede bala two-sided? Prosecution kag Defense, at the same time?
Sunu sa iya, ang duty sang Prosecution amo ang “to ferret out the truth, and not to win their case.” Ihatag na lang ang pagdaug sa Defense?
Gin-address ining panugdaon ni “Bad Boy” direkta kay lead prosecutor Batangas 2nd District Rep. Gerville Luistro.
“Dear Ms Luistro, Justice is impartial (wala ginaapinan)!” matigda niya gani nga pagturasok kay Rep. Luistro. Daw trabaho man ina sang hwes (judge) kag sang senator-judges halin sa pagbayluhanay sang ebidensya kag argumento sang Prosecution kag Defense, indi bala?
Dugang niya nga ang rolyo naman sang Defense sa pag-apin kay VP Sara amo ang maamligan ang “human rights” kag ipaseguro ang “balance of power”.
Ano nga “human rights” kag “balance of power” man? Aba, gareklamo gani ang iban nga mga senador nga gapalanglapaw ang tion nga nahatag sa Defense agud mapangapinan si VP Sara sa iya kaso. Duha lang ka minuto ang ginhatag sang Presiding Officer sa kada senator-judge, pero sa ila pagdepensa kay VP, sunu kay Senador Raffy Tulfo, galab-ot gani sa 10 ka minuto.
***
Sa aton court proceedings, kag sa Impeachment Trial man, tatlo dira ang importante nga players – ang Judge, ang Prosecution kag ang Defense.
Obligasyon sang Prosecution ang pamatud-an ang ginaalegar nga kasal-anan sang akusado sa ila masarangan, samtang ang Defense naman ang magapangapin sa akusado.
Samtang trabaho naman sang Judge ang maghatag sang “fair and just” nga paghusgar sa tunga sang pagsampok sang Prosecution kag Defense sandig sa kon sin-o sa ila ang mapatihan sang judge. Nga indi madikta sa Judge, unless biased man ini ukon nabakal si Judge!
***
Paano abe maseguro sang husgado, ukon Impeachment Court, ang kamatuoran kon isa ka bahin lang ang pamatian niya, nga indi pamatian ang pihak nga bahin? Otherwise, wala kita sang mabasehan kon sin-o gid ang gasugid sing matuod kay wala na sing maga-challenge sang ila panestigo.
Bisan sa pagpamatuod kon ang isa ka kandidato sa pagka-santos sang Simbahan Catolica bagay sa ina nga pagkilala, kinahanglan man gani nga may mag-challenge sa ginaalegar nga pagkatawo sang sinang kandidato. May ginatugyan gid ang Simbahan nga Devil’s Advocate agud mapihu gid ang pagkatawo sang kandidato sa pagka-santos.
Ang Bibliya nagasiling gani nga dapat may duha ukon tatlo ka testigo agud maseguro kon ano gid ang kamatuoran sa pagpanestigo nila – kon diin pwede sila magsupakay sang panestigo agud mapalutaw gid kon ano gid ang kamatuoran sa paghusga sang isa ka masaligan nga tulugyanan sa ina nga obligasyon.
In other words, indi dapat isalig ang kamatuoran sa isa lang ka bahin. Dapat ma-challenge ina, kag ang paghusgar mahatag sa isa ka masaligan sang paghusgar, katulad sang hwes sa korte ukon sang Impeachment Court sa Impeacchment case ni VP Sara.
***
Nalipat lang seguro si Senador Robin parti sa kon ano ang natabo sang iya kaso sa “illegal possession of firearms”, kon diin ginhusgaran siya pagkatapos nga pamatian sang hwes (judge) – indi lang ang Prosecution – kundi pati man ang Defense, kag masentensyahan siya sang hwes tubtub buhi.
Ginhiwat ang pagpasaka sang kaso kay Senador Robin sang Angeles City RTC tubtub sa Korte Suprema, nga nagpanubo ugaling sang iya sentensya. Pasalamat siya kay na-pardon temporaryo siya sadto ni President Fidel Ramos tungod sang todo kampanya niya para kay Ramos bisan yara siya sa prisuhan. Kag na-absolute pardon pa ni anay Presidente Duterte, nga naghatag, no doubt, sa iya sang canine loyalty kay Digong.
Tungod sini, naseguro gani naton nga ang iya boto pabor sa acquittal ni VP Sara, nga anak ni Digong, samtang nagasugod pa lang ang Impeachment Trial. Insulto ugaling ini sa mga pumuluyo nga may isa sila ka senator-judge nga kuno “impartial”, gali biased.
Suportado man gani niya ang ginapabando nga pagdalagan ni VPSara sa pagka-Presidente sa 2028. Nga daan No. 1 ini kuno sa ila survey. Ambot kon nakahibalo man siya nga may isa man ka survey nga nagasiling nga 0.3% lang ang presidential chances ni VP Sara, kag ang nagapanguna amo si Leni Robredo nga may 29%, nga ginasundan ni Raffy Tulfo nga may 26%.
Indi man siya malipat sang mga 90% nga boto sang mga congressman sa Kamara sa Impeachment ni VP Sara.
Mabudlay ini sulayon nga sentimiento batok kay VP Sara kon madalagan gid man siya. Kamo man nga biased nga senator-judges, basi luyag man ninyo tilawan lubagon ining massive nga sentimiento sang sining mga congressman sa pagdalagan ni VP Sara kag ninyo man sa inyo pagdalagan liwat.
Maayo pa seguro nga mapa-resign lang ninyo si VP Sara agud wala na sang dugang nga mahalitan pa./PN
