NAKAKUMPISKAR sang masobra P165.5 million nga balor sang ilegal nga druga ang Police Regional Office 6 sa bug-os nga rehiyon sa nakalipas nga tatlo ka bulan paagi sa 415 ka mga operasyon.
Kanami pamatian. May numero nga balasehan. Masiling naton nga nagatuman gid ang kapulisan sa ila katungdanan. Nagatrabaho sila para sa tawo. Ginapasiguro nila nga maamligan ang publiko.
Halin Mayo 22 tubtob Agosto 2022 sa sini nga tuig lang ina suno sa ila accomplishment report.
Madamo naman sang nasab-itan sang medalya sa tagsa ka ginahiwat ang flag ceremony. Madamo naman sang kapulisan ang nakabaton sang plake sang pagkilala sa ila nahimuan. Madamo naman ang may isal-ot nga dokumento sa ila tagsa ka paghandom nga magsaka ang ila mga rangko.
Manami pamatian nga ang kadamuan sang mga opisyal nangin rangkuhan bangud sa ila maasab kag tuman ka gabunan nga pag-away sa ilegal nga druga
Ginatakus naton ang kadalag-an paagi sa numero nga maaguman, ang numero nga nagatuad sang nahimuan kag ang numero nga nagapa-inggat sa estrelya sa abaga sang isa ka opisyal.
Apang, takus bala ini nga sahi sang talaksan para sa ginapabugal nga kadalag-an?
Nabuyo kita sa paglagas sa mga nagaduso kag imbolbado sa ilegal nga druga. Nangin mahapos sila nga target sang operasyon. Kaangay sila sang luto nga bunga nga mahapos singiton kag may mapresentar gilayon nga resulta sa ginhiwat nga operasyon.
Sa kadugayon sang away batok sa ilegal nga druga, wala kita nakabati nga may narungkab nga laboratoryo ukon daku nga personalidad nga amo ang ginahalinan sang ilegal nga druga.
Indi matultulan ang bubon nga ginahalinan sang ilig sang druga apang abayan sang salud sa mga dalakpon nga nagalumbayag sa panghigaron.
Kon may nagasulod nga ilegal nga druga sa isa ka syudad ukon probinsya, ngaa indi matapna ini antes makasulod kag maglapta? Ngaa indi matumod kon sa diin ang eksakto nga ginahalinan kag didto dapat unahon nga papason?
Nahidlaw mamati ang tawo sa pamunuan sang PNP nga may dalagku nga grupo ukon mga personalidad nga nadakpan kag nabungkag ang ila grupo. Dapat may mawasak nga laboratoryo kag mapapas nga operasyon sang sini nga mga tawo nga nagahalit sa pumuluyo.
Ginapasalamatan naton ang dedikasyon sang kapulisan nga maglagas sa mga imbolbado sa ilegal nga druga. Ginadayaw naton ang ila determinasyon nga tinluan ang komunidad batok sa halit sang ilegal nga druga.
Apang, nagapati kita nga may mas mahimo sila labaw sa ila naandan kag rutinaryo na nga hilikuton. Nagapati kita nga may kapasidad sila nga magtultol sa ginahalinan kag magpukan sa mga ginahukmungan.
Para sa akon, ang talaksan sang kadalag-an ini lamang sa numero sang mga nadakpan, kabug-aton sang druga nga nakumpiskar, kag kadamuon sang nahiwat nga operasyon.
Ang matuod nga talaksan sang kadalag-an amo nga wala na sang may madakpan bangud wala na sang may ibaligya, wala na sang may nagagamit ungot wala na sang may baklan. Mas importante nga hilway ang komunidad sa halit sang ilegal nga druga. Dapat wala sang may nagasulod kag nagalapta nga druga sa aton palibot.
Mas manami nga talaksan sang kadalag-an ang hilway sa druga nga komunidad.
Kon padayon ang pagsulod sang ilegal nga druga, padayon man nga may magagamit kag padayon man nga may nagabaligya.
Batakon naton sa mas mataas nga lebel ang kampanya batok sa ilegal nga druga.
Kon sadto, ginagmay nga gramo kag pila ka sachet lang ang makumpiskar, subong halos kinilo na ang marekober kag milyunes ka pesos na ang bili sini.
Nalimtan na ang ginhiwat nga mga sinapol sadto nga butangan sang x-ray machine kag K-9 ag mga pantalan.
Makasiling man kita na ginapabuyan-buyanan ang ini nga bagay. Wala gana ang lokal nga gobyerno sa pagseryoso sa iya plano nga papason ang ilegal nga druga. Nangin mahapos ang pagsulod bangud wala sang lambat nga nagasiud.
Pantalan ang pinakamahapos ang agyan sang pagpasulod sang mga kontrabando. Apang, ginapatumbayaan kag wala ginapatuman ang mga nahambalan nga solusyon.
Ang pagpatumbaya isa man ka sahi sang sala.
Tion na nga pabudlayan ang mga nagaluto sang ilegal nga druga. Punggan ang ila paglusot sa mga pantalan, kag ipakita ang kusog sang kapulisan paagi sa pagpapas sa mga dalagku nga personalidad nga yara sa likod sang pagbaligya sang ilegal nga druga.
Mas angay nga ipabugal nga kadalag-an kon mahilway ang komunidad sa ilegal nga druga, nga wala na sang baklan kag wala sang may nagagamit.
Ang matuod nga talaksan sa kampanya batok sa ilegal nga druga indi ang mga bugalon nga numero kundi ang mapainubuson nga maayo nga mehora nga gina-eksperyensya sang mga tawo.
Mas maayo nga wala sang isipon nga numero sang kadalag-an basta zero lang sa halit kag katalagman ang tanan. (bertladera@gmail.com/PN)
