GINPASAR na sa third reading ang Senate Bill 1083 nga nagaduso sang Anti-Terrorism Act of 2020.
Na-aprubahan una ang kasubong nga hagna sang Kamara sa idalom sang House Bill 6758. Tatlo sang nagpirma diri amo sanday Iloilo City Congresswoman Jam-Jam Baronda, Second District Congressman Mike Gorriceta kag Fifth District Congressman Raul Tupas, isa ka PMA graduate kag karon chairman sang House Committee on National Defense and Security.
Magahatag kuno ini sang dugang nga ngipon sa Security Act of 2007. Of course, sa ila pagpati nga alarming na ang security concerns sa pungsod. Pero, daw indi man. Ano abe sa inyo?
In fact, gin-endorso ini ni President Duterte bilang “urgent bill” kag mapatuman na kon mapirmahan niya.
***
Ang isa ka bulong dapat indi lang “effective” kundi “safe” nga gamiton.
Similarly, ano abe ang pulos nga maubos ang tanan nga mga terorista – nga imposible, tungod indi man gani mahimo ini sang mga dalagku nga mga nasyon – kon magapabilin nga pirme ginakulbaan ang mga pumuluyo sa posible nga mapriso sila sa idalom sang warrantless arrest nga ipatuman sini?
Paano na lang ang kinamatarong sang mga pumuluyo sa ila “life liberty, and pursuit of happiness” nga ginhatag sa ila sang aton 1987 Konstitusyon kag sang Makakagahum?
Sa aton Demokrasya, sunu sa isa ka English jurist, “Better that 10 guilty persons, than that one innocent suffer.”
Sa isa ka bahin, ang mga iron-handed leaders katulad ni German Chancellor Otto von Bismarck, nagapati nga “It is better that 10 innocent men suffer than one guilty man escape.” Amo man ini ang panindugan ni Che Guevara, nga kilala sa iya mabaskug nga pagsuporta sang komunismo ni anay Cuban President Fidel Castro. Tungod sini, madamo ang nagkalamatay nga wala sing “due process” kag daw mga manok lang nga ilihawon.
In other words, may problema kita sa pagpatuman sining Anti-terror nga kasuguan, tungod sang posibilidad nga mangin katulad ini sang Marcos martial law regime sa pagpatuman sini sang warrantless arrest.
Hopefully, though, ang magapatuman amo ang may pagtaha sa “a government of the people, by the people and for the people”, nga sinmpaan naton sa Demokrasya, katulad ni anay US President Kennedy kag US President Eisenhower, nga bisan mga military people nagakilala sa “sovereignty of the people”.
Otherwise, it will be a hell living for free men in this country under this Philippine Anti-Terror Act!
***
Tandaan naton nga ang COVID-19 gindala diri sa aton sang mga biyahero halin sa gwa sang pungsod.
Una na dira ang halin sa Wuhan, China kon diin nagsugod ini, kag gindala man diri sa Western Visayas sang halin sa high-risk nga mga lugar sa pungsod katulad sang National Capital Region (NCR).
Gani, seryosohon ta gid ang pagpabalik sang biyahe eroplano diri sa Iloilo City kag sa kabug-usan sang Western Visayas. Istriktuhon gid!
Sa subong, wala pa ginatugot sang Civil Aviation and Authority of the Philippines (CAAP) ang mga commercial flights pasulod man ukon pagwa sa Western Visayas, nga yara na sa Modified GCQ, sa diin pwede na ang mas maluag nga panghulag.
Isa sang mga international airports ang Iloilo Airport sa Cabatuan, Iloilo. Ginakilala ini nga Gateway to Western Visayas, nga sang wala pa ang COVID-19 pandemic may 25 na ka flights pasulod kag pagwa kada adlaw sa rehiyon.
Ang International Civil Aviation Organization (ICAO), sa bulig sang World Health Organization (WHO) kag sang International Air Transport Association (IATA), nagapanugyan sang masunod nga mga guidelines sa pagbyahe sang mga eroplano:
Paggamit sang face mask sang tanan nga pasahero kag workers sa eroplano kag sa erport;
Pagkuha sang body temperature sa tanan diri angot sa COVID-19 infection;
Masami nga disinfection sang eroplano kag erport;
Pagpatuman sang physical distancing, at least one meter;
Limitado nga terminal access sa mga pasahero kag ila kaupod, katulad sang naga-upod sa mga disabled;
Paghulat sa turn sa toilets nga indi kinahanglan mag-linya;
Pagbyahe nga dala lang ang mamag-an kag isa lang ka bagahe;
Wala sing reading materials (newspapers, etc.) nga tugtan kag limitado ang paghatag sang duty-free sales; kag
Mga flight attendants dapat nagasul-ob sang personal protective equipment (PPE) lakip ang face visors, medical masks, kag guantes (gloves).
Ining guidelines gin-aprubahan sang ICAO. (w_mateojr@yahoo.com/PN)
