SALAMAT SA DIYOS kay natuman gid man ang handom ko sadto nga may isa ka abogado sa amon pamilya sang malakip ang anak ko nga si Jowenna sa listahan sang mga nakapasar sa 2025 bar exam nga ginpagwa sang Korte Suprema sining ulihi lang sang Enero.
Kulang na lang ang pagsumpa (oathtaking) agud formal na ang pagkilala sa iya bilang abogado, samtang gatrabaho bilang Certified Public Accountant (CPA) sa Commission on Audit (COA).
CONGRATULATIONS ANAK! Upod kay Mama mo kag si Jollina nga manghod mo, kag sang mga himata naton kag mga tapik, mga abyan, katrabaho, kag mga kabarangay diri sa Brgy. Q. Abeto–Mirasol sa Mandurriao, Siyudad sang Iloilo.
***
Ang pagka-abogado sang anak ko nga si Wen nangin daku gid ini nga bugal sang amon pamilya tungod gaishanon gid lang siya nga abogado sa amon pamilya.
Sa amon pamilya, luas kay Wen kag manghod niya nga si Len nga public school teacher, ang amon pamilya may madamo na nga mga manunudlo, school director, school superintendent, mga nars kag health workers, piano teacher, piloto, doktor, mechanical engineer, chief marine engineer kag ship captains sa international shipping, kag ako nga nangin manunudlo man kag gaisahanon nga journalist sa amon pamilya.
***
Second year na ako sa Law sa anay University of Iloilo sang gin-deklarar ni anay Presidente Ferdinand Marcos Sr. ang Martial Law sadtong 1972.
Hinadlukan ang akon iloy sa kon ano ang matabo sa akon tungod padayon ako na-link sadto sa hublag panghimakas sang mga estudyante sa amon pagtulod sang Student Power batok sa wala konsyensya nga gobyerno.
Presidente ako sadto sang Iloilo College Editors’ Guild kag co-chairman sang isa ka Regional Student Group upod kay German Gonzales nga presidente sang UP-Iloilo Student Council. Sa pag-deklarar sang martial law, Senate President ako sang UI Student Republic samtang Pol-Sci representative si German sa iya pagsaylo halin sa UP-Iloilo.
Labi na gid nahadlukan ang amon iloy sang nadakpan na si German kag si Ed Peñaredondo sang isa ka progresibo nga grupo kag dayon nahunong sa stockade sang Camp Delgado.
Gani, ginpatapok ako sang amon iloy sa isa ka fisherman’s barangay sa Guimaras nga nahigot sa obligasyon nga magtatap sang diutay namon nga pangabuhian didto.
Wala ako makabalidad sa luyag sang amon iloy tungod malubha ang iya pagmasakit. In fact, bedridden siya sa sulod sang anom ka tuig bag-o nagtaliwan sadtong 1979 kon san-o nagbalik na ako sa pagpuyo sa siyudad.
Sa pagdaug na sang Edsa Revolution nangin mga konsehal na sanday German, nga nagtaliwan na, kag Ed sa Siyudad sang Iloilo. Nag-abogado anay si Ed bag-o magsulod sa pulitika. Ako nagpatupling sa media work sa radyo kag sang ulihi sa pamantalaan lokal tubtub nangin editor-in-chief sang duha ka pamantalaan lokal.
Nag-retiro ako nga na-dismiss ang mga 30 ka libel cases bilang reporter, kolumnista kag editor-in-chief upod ang nangin editor-in-chief man nga si Alex Vidal. Na-base karon si Alex sa United States bilang health worker samtang gasulat gihapon bilang kolumnista sa isa ka lokal nga pamantalaan (indi Panay News) diri sa Siyudad sang Iloilo.
Tungod sa gamay ko nga SSS pension, nagtilaw ako magsulat liwat, this time sa isa ka Europe-based bi-monthly magazine – ang Roots & Wings nga ginadumalahan sang mag-utod nga Rachel Gaje-Hansen bilang ed-in-chief kag Luz Gaje-Bergersen bilang associate editor, nga naga-existir tubtub subong nga mga 15 anyos na. Taga-Iloilo man ining duha.
Naka-contribute ako diri sang duha ka artikulo – ang isa parti sa Dinagyang kag ang isa parti sa isa ka Guimaras tourist spot.
Sa kada isa sini nakabaton ako sing US$100, ukon mga PhP4,500 sa tion nga ato, katulad sang ginahatag man sang mga foreign magazine, kasubong sang Readers’ Digest, sa mga mapuslanon nga mga artikulo.
Wala na ako makapadayon sa pagsulat sa R&W sang na-mild stroke ako. Apang wala ako nadulaan sang paglaum. Sa pag-recover ko na, naga-contribute na gid lang ako sang kon ano nga masulat nga mabungahon sa lokal nga mga pamantalaan.
Subong gani, gasulat ako sang akon weekly column diri sa Panay News./PN
