PAGPADUMDUM anay ini sa mga katapo sang Cupid (UI-Iloilo City) kag Apollo (UI-Ungka) chapters sang Sigma Rho Iloilo sa ila 4th Reunion sa Domingo, Marso 22.
Place: Joe III Beach Resort sa Villa, Arevalo sa tupad sang Breakthrough Restaurant
Time: a las onse sang aga (11 a.m.)
Attire: Bohemian, Hawaiian. Choose your style
Theme: “Our path may change as life goes along but as Sigma Rhoans, the BOND between us will remain strong.”
FOR THE SIGMA RHO, FIGHT!!!
Pwede ninyo ma-contact si Sis Rosalie Rivera sang Cupid Chapter para as mga detalye nga luyag pa ninyo mahibal-an.
***
Mga tatlo na ka semana nga wala kami diri as Panay News Compound Area (Podco dirt road) sa Mandurriao sang PLDT-provided nga telepono (landline) kag internet.
Ina tungod kay tubtub karon indi pa maka-desidir ang natungdan nga upisina sang Iloilo City Hall – daw ang OBO bala – kon diin kami mahimuan sang dalan pasulod kag pagwa diri sa amon.
Pagkatapos ato sang gin-abisuhan na kami sang bag-o nga tag-iya sang lote sa tunga namon diri kag sang main road. Ginapasara na sini ang temporaryo nga dalanon (Podco dirt road) nga ginagamit namon sa sulod sang sobra 30 anyos nga ginpasugtan sang una nga tag-iya.
Diri man gani ginapaagi ang tubo sang MIWD (MPIW subong) sa dalan nga ini agud matagaan sang drinking water ang mga pumuluyo diri nga gintukod sadtong mga 1995 sa pagpatigayon ni anay Mayor Malabor kag MIWD chairman Larry Jamora.
Mga 100 ang kadamuon sang mga pumuluyo diri, lakip na ang mga 50 ka mga boarders nga nagatrabaho dira sa WV Medical Center, mga call centers, kag mga service workers sa malapit nga mga food chains, kag mga estudyante sa mga eskwelahan nga malapit diri as amon.
Salamat kay nag-aksyon dayon ang Iloilo City Hall. Ginkadtuan gid sang mga tinawo sang city hall ang amon lugar agud ma-desidiran ang conveniente nga dalan nga himuon pasulod-pagwa diri as amon.
Ugaling, halin sadtong mga tatlo na ka semana nga nagligad, wala na makabalik ang mga tinawo sang city hall agud mapaseguro sa amon kon diin gid kami makaagi. Kag kon bala ma-donate ini sang bag-o nga tag-iya ukon baklon na gid lang sang gobyerno sang siyudad.
Meantime, madamo nga problema ang ginaatubang sang mga pumuluyo diri.
Ang isa ka problema namon diri amo ang pagpakuha na sang mga poste nga ginapaangtan sang electric lights sa 300 ka metro nga kalawigon sang ining Podco dirt road, nga napasugtan man sang una nga tag-iya.
Tungod wala na kami sang suga sa dalan, may kahagnop na ang amon pagpanglakaton diri bangod ang siga sang imo cellphone makahatag lang sang kasanag sa imo kaugalingon nga indi makalab-ot sa unhan ukon sa likod mo.
Kon magsakay ka man sa taksi pasulod diri as amon, masami ginabalibaran ka man sang taxi driver kay lubak-lubak ining Podco dirt road. Bisan gani ang traysikol gabun-a sa pag-agi diri. Sadto, ginapasugtan pa kami sang una nga tag-iya agud matampokan ang mga luob-luob diri, nga indi na namon mahimo subong.
Ang mga 10 ka salakyan sang mga tag-iya diri gabun-a man gani bisan pa mataas ang pang-idalom sang mga ini. Pati ang garbage truck nga nagakuha sang amon basura diri daw matumba gani sa pagsulod-pagwa diri.
Isa pa, indi na makapaangot ang PLDT sang telephone kag internet lines pakadto as amon kay indi na ma-otorisahan sang mga private lots nga naga-corner sang amon lugar diri.
May ga-offer sang wireless (prepaid) connections, apang indi man makapaangot sang landline kag indi man makahatag sang signal pareho ka baskog sangsa PLDT kag kasubong nga providers diri.
Hambalon pa, nagahatag ini sing daku nga problema sa mga estudyante diri nga gakinahanglan sini sa ila online classes. Subong man sa mga empleyado nga gakinahanglan sang internet sa ila online work-from-home.
Nagpautod na gani ang pila ka puluy-an diri sang ila connection sa PLDT kag iban pa nga providers, samtang ginapalibugan pa kon diin makapaangot sang bagay nga communication connections.
***
By the way, diri man gihapon nagapuyo ang pamilya sang nagtaliwan na nga si Danny Fajardo, founder sang Panay News, bisan ang editorial office sini nagsaylo na sa Maliao, Pavia. Nagatindug man diri ang pila ka propiedad sang nagtaliwan nga si anay Congressman Raul Gonzalez nga ginasibaw-sibaw man sang ila mga tinawo.
Tani mapadasig na sang city hall nga matagaan kami sang dalan pampubliko pagwa-pasulod diri sa amon lugar agud masolbar, sa indi madugay, ining amon problema sa telepono kag internet, lakip ang internet-connected nga TV, diri. Pwede, meyor?/PN
