TRABAHO anay antes mangampanya.
Ini ang panugyan ni Department of Interior and Local Government (DILG) regional director Anthony Nuyda sa mga politiklo ilabi na ang liwat nagapapili ukon reelectionist.
Suno kay Nuyda malayo pa ang ti-on sang kampanya gani dapat trabaho anay ang mga politiko.
Ini nga pahayag ni Nuyda bunga sang malapnagon na nga pagpangkabit sang mga posters kag iban pa nga klase sang campaign paraphernalia kag personal nga pagpangampanya sang mga politiko.
Maluwas sa nakakabit nga mga campaign posters, makita man sila nga nagapamalaybalay agud mangampanya.
Diri sa syudad sang Iloilo nagsiling si Mayor Jose Espinosa III nga tun-an niya ang pagpakakas sang mga posters sang mga politiko sa palibot sang syudad, ilabi na sa mga pampubliko nga lugar kag buildings kaangay sang barangay halls. Pahayag sang alkalde, may ordinansa ang syudad nga nagadumili sini. Partikular na ang Sections 5 kag 6 sang Regulation Ordinance 2013-330 ukon ang ordinansa nga naga-regulate sa mga streamers kag billboards sa sa syudad sang Iloilo.
Apang antes pa man nakahimo sang tikang ang alkalde mainit na ini nga ginsug-alaw sang pagpamatok sang Liga ng mga Barangay sa syudad. Siling ni Liga president Ma. Irene Ong, kasuhan niya sang trespassing ang sin-o man nga suguon sang alkalde nga mangkakas sang posters sa ila barangay. Panindugan ni Ong, sila ang mayor, presidente kag gobernador sa ila barangay. Maluwas diri, kabahin man sang ila freedom of expression ang pagkabit nila sang mga poster sang ginasuportahan nga mga politico.
Sa iya interviews ginsiling man ni Cong. Jerry Treñas (nga kandidato sa pagka-mayor sa syudad sang Iloilo) nga ang ordinansa dapat magsanto sa Konstitusyon. Ang pagkabit sang posters freedom of expression kuno.
Abi kay may public outcry sa inyo katig-a sang ulo, kun kamo matuod nga halangdon, ipakakas sa inyo sumalakdag ang ini nga mga posters. Ang sin-o man nga politiko indi makapanghinaw kag magbalibad nga ila ina sang ila mga supprters kagustuhan nga magkabit sang mga posters.
Maathag nga ginahimo mango sang mga politiko ang mga botante. Una kun kaalyado sila, masiling ayhan si Mayor Espinosa nga ipakakas niya ini?
Sa bahin naman ni Treñas, kun matarong ka, abi hambali ang imo mga supporters nga kakason ang imo mga posters. Okay lang ina kun kay Treñas lang ang nawong nga ara sa posters kay daw may rason pa bilang incumbent nga kongresista. Ang malaw-ay kay bug-os niya nga line up ang ara gid sa tarpaulin. Sa simple nga pulong, maathag nga timprano nga pagpangampanya na sila.
Kun ikaw matarong nga politiko, bisan pa nga wala mo ginsugo ang imo supporters, indi ayhan matarong pa gid kun ipakakas mo ang ini nga mga posters? Sigurado ako nga indi nila ini pag-ipakakas.
Diri sa Pilipinas ang mga politiko madamol sang nawong. Matuod gid ang hulubaton nga kun pilasan mo sang labaha ang guya sang mga politiko subong, bwas pa sa aga magadugo bangud sang kadamol kag pagkakibulon.
San-o pa kita makaangkon sang lider nga may huya man? Lider nga may delikadesa. Lider nga matuod nga nagapanghimanwa, indi ang target nga pun-on ang bulsa?
Siguro sa damgo na gid lang! (jpranco1975@gmail.com/PN)
