NAKAPASAR man ang syudad sang Iloilo sa validation sang Department of Interior and Local Government (DILG) sa ila paghimakas nga matinluan sang mga sablag ukon obstructions ang mga dalanon kag public roads.
Suno kay Bacolod City DILG director Ma. Marideth Madayag, ara sa 70 percent to 80 percent ang compliance sang syudad. May mga bagay lang nga dapat pasanyugon.
May mga barangay nga namitlang nga kulang ang ila pagbuylog. Pinakamadamo gid sa Jaro. Sa pihak sini nangin halog man ang DILG bangud suno kay Madayag may mga factors man nga ginatan-aw antes maghatag sang ila assessment kag validation.
Bisan paano, diri lang guro sa syudad sang Iloilo indi maggamo ang clearing operations. Pati ang mga sidewalk vendors matawhay sila nga nagsunod sa gusto matabu sang syudad. Nagpakita sila sang respeto kay Mayor Jerry Treñas bisan pa nga masakit sa ila buot nga madulaan sang palangabuhian.
Nagmadinalag-on si Treñas sa pagkumbinser sa mga vendors nga tumanon ang mando. May kinaiya si Treñas nga ang iya palang presensya, daw makapakalma na sa mga vendors.
Makita man natun bisan nga nagatulo ang ila luha kag asta subong wala pa nabaton ang assistance sang syudad sa ila, wala ka sang mabati-an nga reklamo. Bisan pa nga ang ila sitwasyon daw tinapok sa lugar nga wala gani mahimos, wala sila sang may mahambal nga malain nga tinaga sa alkalde.
Apang ngaa may mga empliyado subong sa city hall nga nagasinggit sang inhustisya? May mga empliyado nga biktima sang coercion, oppression kag harassment santo sa ila mga alegasyon kag kaso nga ginpasaka sa Ombudsman?
Maathag man nga indi lang ordinaryo nga tawo bangud may mga department heads na nga nagkaso sa alkalde.
Ngaa kun makarespeto ang mga vendors sa alkalde lubos-lubos? Ngaa ang mga empliyado wala sang kahadlok nga nagapasaka sang kaso sa iya kag sa iban pa? Ano ang buot silingon sini?
Ayhan sila lang ang makasabat! (jpranco1975@gmail.com/PN)
