ANG MASUNOD personal ta lang nga pagpati, nga basi indi man magsantu sa inyo kaugalingon nga pagpati.
Nagapadumdom ining pagpati naton sa problema nga ginhaboy sa aton sang abyan ko nga si Pedro.
Sa padayon nga kinagamo nga nagakatabo sa mga dalanon angot sa Israeli-Hamas war, labi na gid sa mga Demokrasyahon nga mga pungsod, nagalibog gid ang ulo ni Pedro kon ngaa dapat tagaan pa sing lubos nga Kahilwayan ang kasubong nga mga pumuluyo sa ila subong ginahimo.
Daw ginaabusaran man lang gani nila ining ginahatag sa ila nga Kahilwayan nga nagahatag sing kakulba kag katalagman sa kabug-usan sa pagsalpukan sang duha ka bahin, indi bala?
Well, pwede man indi pag-abusaran sang mga pumuluyo ining Kahilwayan kay may Responsibilidad man sila sa malinong nga pagpautwas sang ila mga balatyagon. Kon abusaran nila ini, pwede naman sila punggan sang gobyerno sing nagakabagay.
Sa mga Demokrasyahon nga mga pungsod, may nagakabagay man nga mga kasuguan angot dira, katulad sang yari diri sa Filipinas kag sa Estados Unidos, nga pwede naman mapatuman kon dapat na.
***
Remember nga indi naton ginpangayo ang Kahilwayan nga ini sa Diyos. Siya mismo ang naghatag sini sa aton agud gamiton sa matarong nga paagi.
Saksi pa ang ginhatag nga Kahilwayan kay Adan kag Eba, nga gingamit nila ugaling sa pagsuay sa sugo sang Diyos nga indi magkaon sang ginadilian nga Prutas sang Kinaalam (Fruit of Knowledge of Good and Evil) sa Paraiso.
Ining Kahilwayan nga ginhatag sa ila pagtilaw man gali sa ila kon tubtub gid diin mapakita nila ang ila lealtad sa Diyos.
Tungod sa ila pagsuay sa sugo sang Diyos ginpalayas sila sa Paraiso. Nakuhaan sng kabuhi nga walay katapusan. Nag-antos. Kag nag-atubang sa madamo nga kabudlay kag katalagman sa gwa sang Paraiso upod sa ila kabataan kag kabikahan nga nagpatuman lang sang ila luyag sa ila pag-inupod.
Wala dira nagtapos, ugaling, ang pagtilaw sang Diyos sa tawo agud maseguro ang tuod-tuod gid nga lealtad nga mahatag nila sa Iya.
Ginsugo sang Diyos si Abraham nga patyon ang iya anak kag ihalad ini sa Iya bilang sakripisyo.
Apang, indi katulad ni Adan kag ni Eba, wala ginsuay ni Abraham ang luyag matabo sang Diyos nga ihalad ang kabuhi sang iya anak nga si Isaac bilang sakripisyo sa Diyos bisan pa ini tuman kasakit sa iya bilang amay.
Sang buot na kutlon ni Abraham ang kabuhi sang iya anak bilang sakripisyo, ginpunggan ini sang mga anghel sa sugo sang Diyos kay kumbinsido na Siya sa pagka-masinulundon sini sa Iya.
Diri napamatud-an sang Diyos ang lealtad ni Abraham sa Iya, gani sa kabikahan ni Abraham ginpat-ud sang Diyos ang pagpatuman sang kaluwasan sang na-kondenar nga kabikahan ni Adan kag ni Eba kag buksan ang Kalangitan sa ila.
Sa pagpadayon sang panglakaton sang iya kabikahan, gintugyan na Niya ang Napulo nga Kasuguan (10 Commandments) sa kabug-san sang katauhan kay Moses, pagkatapos nga pangunahan sini ang pagluas sa pagka-ulipon sang mga Israelita sa idalom sang gahum sang hari (Pharaoh) sang Ehipto.
Sa gihapon wala ginkuha sang Diyos kay Moses ang Kahilwayan kon ano ang magpatuman sang Iya Napulo nga Kasuguan sa katauhan.
Nangin sobra ka istrikto ugaling si Moses kag nagpatuman sang kasuguan nga “an eye for an eye”, kon diin kon makapatay ka kamatayon man ang imo silot kag ginpasugtan ang pagpatay sa “adulterous” nga babaye paagi sa paghaboy sang bato sa iya.
Wala sa sugo sang Diyos ang silot nga kamatayon sang mga tawo sa kamot sang kapareho nila nga tawo. Ang Diyos, nga nagtuga sa ila, lang ang makahimo sini kag maghatag sang dayon nga silot diri man sa duta kag sa pihak nga kabuhi.
Kon matugutan man nga mahimo ini sang tawo ina agud lang sa pangpangamlig sa kaugalingon (self-defense), matarong nga pagpakig-away (just war), kag sa pagpangapin sa kay bisan sin-o man nga luyag patyon sang may kaugot sa iya.
***
Indi nagustuhan sang Diyos ang mga silot nga kamatayon nga ginpatuman ni Moses kag ginpadala Niya si Hesukristo nga Iya anak paagi kay Maria agud mag-tindug sa Iya bug-os nga luyag para mapatigayon na sing pat-ud ang kaluwasan sang katauhan.
Ginbag-o ni Kristo ang silot nga kamatayon sa kamot sang tawo kag, sa lugar sini, ginpalapnag ang kapatawaran sang Diyos Amay sa sin-o man nga nagahinulsol sing hugot sang ila kasal-anan kag luyag magpanibag-o sang ila kabuhi. Nga sa karon amo na ang ginapatuman sang Kristiyanong katilingban./PN
