Ginhawanan kag ginparkingan

NAMENTAHA sa lugar nga nangin maligwa. Ginpahalin ang nagabaligya, ginsubli sang motorsiklo kag salakyan. Nalugaw-an ang katuyuan nga mangin matawhay ang paglakat sa dalan.

Pila ka adlaw na lang ang nabilin kag magatakop na ang 60 ka adlaw nga ginhatag nga plaso sa tagsa ka mga local government unit nga mahawanan ang mga dalan gikan sa mga nagapunsok nga baligya, mga istruktura nga nagabalabag kag mga salakyan nga nangin ila pribado nga parkingan.

Umpisa subong, tatlo ka adlaw na lamang, ukon sa Setyembre 29 na ang deadline para sa tanan nga dapat matuman ang mandu ni Presidente Rodrigo Duterte pinaagi sa Department of Interior and Local Government.

Nangin masupog ang tanan sa pagpatuman sang direktiba. Mansig himo sang diskarte ang tagsa ka mga lokal nga yunit sang gobyerno agud nga masunod kag may ipakita nga hinimuan antes magtakop ang plaso nga ginhatag sang gobyerno nasyunal.

May mga LGU nga madasig ang pagpatuman sang paghawan, may mga LGU naman nga nagapaayon, nagahatag sang kariyo, sang tion, sang bulig-pinansyal kag opsyon nga lugar. May mga lideres sang banwa nga nagalantaw sa ila malawig nga pagtenir sa pulitika rason nga ila ginaduyan ang mga natungdan agud ng indi magsunggod kag kaugtan sila sa masunod nga piniliay.

May mga barangay nga nagabuylog, may mga yara man sang nagpabungol kag halos daw wala sang pag-imprubar nga makita sa ila nasakupan. May mga barangay nga wala masyado sang problema nga hawanan. May mga barangaya naman nga mayoriya sang ila nasakupan madamo sang dapat hagbason kag pangtaltalon agud makita ang ginahandom nga paghawan.

Apang, lantawa ang mga kilid sang dalan nga naghawan nga ginbakantehan sang mga sidewalk vendor, ginsubli sang mga motorsiklo, tryasikol, traysikad kag mga salakyan.

Ginhimo nga parkingan ang porsyon nga nahawanan ilabi na sa mga kilid sang merkado. Kaangay man sa mga nagapanguna nga dalanon sa syudad kag sa mga karsada nga yara sa kabarangayan.

Nalipay ang tanan nga nagpakita sang kusog ang city government agud nga pahalinon ang mga nagasablag sa dalan. Kon hungdon sang syudad, may sarang man ini nga mahimo kag matuman man sini ang iya katungdanan nga madugay na niya nga ginpabay-an, madugay na nga ginpabulag-bulagan kag madugay na nga ginalikaw-likawan.

Kuntani liwat nga libuton sang Task Force Hawan sang syudad ang ila nahawanan kag lantawon ang kahimtangan sang ila ginpangabudlayan bangud ini ang ginsubli sang mga kabalan kag wala sang pasunaid nga mga tawo.

Lantawa ang mga covered gym, baskteball court kag iban pa nga malapad nga espasyo nga ginahimo nga parkingan sang mga salakyan kag motorsiklo.

Ang problema indi madula kag mahimo lang nga mapaumpawan sa karon bangud nga mainit sa paglantaw sang national government apang indi ini madula bangud nga ang ugat sang palaligban yara sa tagsa ka ugsaran.

Indi madula ang higayon nga pagtahaw sang implementasyon, magabalik ang sablag sa dalan bangud madamo sang makasarang magbakal sang salakyan apang wala sang natigana nga parkingan.

Hampol-hampol lang ang solusyon nga ginahimo karon sang syudad kag kabarangayan agud nga matabunan ang pilas sang komunidad nga nagabuad-ad sa tagsa ka ugsaran sang panimalay.

Tion na nga pangitaan sang solusyon ang pag-parking sa bisan diin lang kag ang pagbakal sang salakyan nga wala sang kaugalingon nga parkingan. (bertladera@gmail.com/PN)