Gutom lang, indi dungol

ANG TAWO nga gutom, sigurado mangita sang pamaagi agud makakaon.

Ini ang kabangdanan nga may nagakadakpan nga nagapangawat kag iban pa nga krimen. Maluwas lang dira ang mga tawo nga ginahimo na nga palangabuhian ang krimen.

Subong nga panahon sang coronavirus disease 2019 (COVID-19) ngaa mabudlay nga punggan ang mga tawo nga pagpabilin sa ila balay?

Ngaa nagapakigbais sila sa otoridad para makasulod sa syudad?

Indi ina palatandaan nga dungol sila. Ina bangud sa syudad ang ila palangabuhian. Sila ang mga tawo nga nagakabuhi sa matag-adlaw nga pagbatas kag pagpatulo sang balhas nga sa masami kulang pa ang sweldo nga ginabaton.

Indi man patas nga basulon ta ang tawo kag salawayon sila. Indi man patas nga basulon ta ang gobyerno sa ginapatuman nila nga kasuguan.  Buot hambalon pareho lang nga wala ini nahandaan sang gobyerno kag sang tawo.

Madamo ang nagadepensa sa gobyerno. Pero sa matuod lang, kun wala na ginpasulod ang mga Chinese sa paggwa pa lang sang balita nga sila ang sentro sang pandemic, kuntani wala na ini natabu sa atun.

Kuntani kun ginpauntat man ang byahe sang mga Pinoy sa China, napahagan-hagan natun ang problema.

Subong man, indi na kita magbinasulay. Magahimo na lang kita sang mga tikang nga indi man matam-an sa kabudlay ang mga pumuluyo.  Indi man kita nga mga pumuluyo magpasobra sang pasaway sa atun gobyerno.

Simple lang man sini ang dapat himuon. May pagkaon ang mga tawo sa ila balay sa bulig sang gobyerno. Bangud tubtob nga nagapanuktok si gutom sa tagsa ka ganhaan, ang tawo magabukas gid kag manaog sa panimalay agud mangita sang ihapin sa nagakalam nga tyan.

Ang mga empliyado sigurado nga magabalik trabaho bangud sa kahangawa nga sa pagpuas sang COVID-19, kabahin na sila sang numero sang mga wala sang trabaho nga Filipino.

Sa atun mga ordinaryo nga pumuluyo, mangin responsable nga residente sang inyo duog. Magtuman sa pagsulondan, magsunod sa matarong nga mando sang mga otoridad. (jpranco1975@gmail.com/PN)

LEAVE A REPLY

Please enter your comment!
Please enter your name here