WALA sang maathag nga pahayag si Mayor Jose Espinosa III sa iya mga plano sa politika para sa May 13, 2019 elections.
Kun pamangkuton sang media ang iya sabat, “Ah, dugay pa ang politika. Politics is divisive, maserbisyo lang ako anay.”
Ang pinakadako nga ginbungat sang alkalde sa politika amo lang ang kumpermasyon nga magapadalagan sya sa pagkaalkalde sang syudad sa 2019 electioons kontra sa iya bilas nga si Cong. Jerry Treñas.
Ngaa bala wala sang may ginabuy-an ga pahayag si Espinosa sa iya plano sa election? Bisan gani ang iya mga tentative nga lineup sa pagka konsehal wala niya ginabuyagyag. Siling lang niya, nagasolobra lang.
Indi ayhan mahinay ang hulag sang alkalde sa iya plano sa 2019?
Siling sang mga nagaobserbar lang, makita na ang preparasyon sang alkalde sa iya mga hulag sa barangay, ilabi na ang “Pag-ulikid” program. May politika man ukon wala sa Pag-ulikid, ini ang isa sa pinakamaayo nga nahimo ni Mayor Joe nga wala nahimo sang iban.
Epektibo nga pagpahumot sang ngalan sang politiko apang mapuslanon naman sa publiko. Maayo na lang ang programa nga bisan may politika nga mapuslan sang publiko sang sa programa nga para lang sa kaayuhan sang politiko. Maayo na lang ini sang sa managtag sang kwarta ang politiko nga maathag naman nga kwarta sang gobyerno ang ginagamit.
Malapit na ang bulan sang Oktobre nga filing sang certificates of candidacy ukon COC apang wala pa sang maathag nga linyada ang alkalde. Mainit na ang ila batalya sang bilas apang easy easy lang si Joe III. Daw makatilingala ang confidence nga ginapakita sang alkalde subong.
Bisan pa nga ang mga kapitan halos tanan ara sa iya bilas ngaa daw wala kulba si Joe III? Ngaa amo na lang ka kampante ang alkalde?
Matuod ayhan ang balita nga may matabu nga suspension sa isa ka dako nga politiko sa masunod nga mga inadlaw?
Matuod ayhan nga pabalay ang isyu nga tunaan sang iya suspension?
Siling sang isa ka masaligan nga tawo, may ginapatawag na nga mga empliyado nga may ihibalo sa proyekto.
Ini ayhan ang rason ngaa kampante si Joe III?
Balantayan kun may ma-suspend. Bantayan kun ano ang masunod nga tikang ni Joe III. (jpranco1975@gmail.com/PN)
