NABATYAGAN na sang mga konsumidor sang kuryente sa syudad sang Iloilo ang amat-amat nga liwat nga pagnubo sa ila balayran. Madamo ang nakamutik kag nakamuno tuhoy diri.
Nagamag-an ang pamatyag sang pumuluyo kag naga-amat-amat man ligwa ang ila badyet kag may magamit na sila nga pangdugang sa ila kinahanglanon sa sulod sang panimalay.
Daku ini nga bulig agud magsulhay ang lakat sang pangabuhi sang mga konsumidor sang kuryente.
Tanan nga ini ang ginahimakasan sang MORE Power, bilang distribution utility sang syudad. Nagnubo ang total average rate umpisa sang Noviembre 2022.
Apektado ang presyo sang kuryente sa hulag sang presyo sang coal kag langis sa world market. Ilabi na kon may mga hitabu nga nagaluntad kaangay sa mga giyera ukon may ginapatuman nga sanction sa isa ka nasyon.
Sa pihak sang sini nga sitwasyon, nangin mahugod ang MORE Power sa pagpahangop sa mga konsumidor agud sila ang maathagan sa mga kabangdanan sa paghulag sang electricity rate kag kadugang sini ang pagpangita sang iban pa nga paagi kon paano mapahagan-hagan ang pagsaka sang balayran.
Sa dalayon nga pagpahangop, naathagan ang mga pumuluyo kag kalabanan ang nagpangita sang paagi kon paano mabuhinan ang ila konsumo ukon mas nagkinot kag ginhatagan sang balor ang pag-usar sang kuryente sa mapuslanon nga tion kag higayon.
Ginpahibalo sang MORE Power nga sadtong Deciembre ang rate nabuhinan sang 15 sentimos, ginsundan sang buhin nga 53 sentimos sang Enero kag dugang nga 50 sentimos sang Pebrero.
Sa kabug-usan, ang buhin sa balor naglab-ot sa piso kag 20 sentimos sugod sang Deciembre.
Sa karon, diri sa syudad sang Iloilo ang total average rate para sa residential consumers amo ang P13.64 per kWh.
Sa karon, naganubo ang generation charges bangud sa nagasarurot nga presyo sang coal sa global market kag sa Wholesale Electricity Spot Market (WESM). Nakita ini nga naganubo sa nakalipas nga tatlo ka bulan kag ginalauman nga magapadayon.
Sa sini nga sitwasyon, lauman ang dugang nga alibyo sang mga konsumidor. Ilabi na nga ang buhin sa presyo sang gatong para sa coal-fired generation companies ang bangud man sa padayon nga pagnubo sa Newcastle index nga amo ang nagadeterminar sa presyo sang coal sa world market.
Ginpatpat na sadto ni Niel Parcon, ang Vice President for Corporate Planning and Regulatory sang MORE Power, na ang presyo sang coal sa world market may daku nga epekto sa ila generation charge kag total average rate.
Ginsiling sini nga kon magsaka ang presyo sang coal, ang ila generation charge nagasaka man, apang kon magnubo, naganubo man ang ila rates.
Luyag sang MORE Power nga mahatag sa mga konsumidor ang bahado nga presyo sang electricity rates agud nga mabatyagan sang bulsa sang mga konsumidor ang kasulhay. Nagalaum ang tanan nga magapadayon ang ini nga trend sang pagnubo agud nga ang mga konsumidor sa syudad sang Iloilo makalaum man sang mas istable kag masarangan nga suplay sang kuryente sa palaabuton nga mga bulan.
Angay man nga talupangdon nga ang buhin sa electricity rates wala pa nalakip diri ang 20 MegaWatt geothermal power supply contract sang MORE Power sa Energy Development Corp nga mas manubo kaysa sa coal-based supply.
Bangud sini, maathag na nga mangin paborable sa mga konsumidor ang paghimakas sang MORE Power nga makapangita sang paagi agud nga mapanubuan ang balayran sa ginakonsumo nga kuryente sang mga pumuluyo.
Angay nga pasalamatan sang mga konsumidor ang MORE Power tungod mas ginapasulabi sini ang serbisyo nga ginatan-ay sa pumuluyo. Ginahimakasan nga mangibabaw ang iya misyon nga makahatag sang istable kag barato nga kuryente.
Ginakay-o ang linya, gina-islan ang guba, ginapanami ang serbisyo agud nga mabuhinan ang uyang sa kuryente kag indi mag-abaga ang mga konsumidor sa mataas nga balayran.
Sa nakalipas nga mga tuig, nangin dedikado ang MORE Power sa pagtuman sa iya katungdanan bilang distribution utility diri sa syudad sang Iloilo. Padayon sini nga gina-imprubar ang iya serbisyo kag ginaulikdan ang mga konsumidor.
Ginatun-an sang MORE Power ang sitwasyon kag ginahimakasan nga mahatag ang masaligan kag barato nga kuryente sa pihak sang nadamo nga konsumidor kag nagadaku nga konsumo.
Naglipas kag magalipas ang panahon apang ang paghimakas sang MORE Power para sa mga konsumidor ang magapadayon agud nga ang serbisyo magatayuyon. (bertladera@gmail.com/PN)
