UNANIMOUS ang nangin boto sang Committee on Justice (53 members present) nga may Probable Cause ang pag-impeach kay VP Sara Duterte. Sunu ini sa report sang philstar GLOBAL, petsa Abril 30, 2026.
Ginapreparar naman ang Articles of Impeachment agud ipasaka na ini sa plenary, ukon kabug-usan sang Kamara.
Kon maaprubahan na ini sa plenary sang isa-sa-tatlo (1/3) sang Kamara, ipadala na ini sa Senado nga dayon (forthright) maghiwat sang Impeachment Trial batok kay VP Sara tubtub may panindugan na ang Senado.
Mapadutlan si VP Sara, sunu sa aton Konstitusyon, sa iya Impeachment case sa boto nga 2-sa-tatlo (2/3), ukon 16 ka boto sang bug-os nga Senado.
Ang maboto diri amo lang ang mga senador, notwithstanding kon bala may kinaalam sila sa legal profession ukon wala. In other words, indi tunay nga mga hwes ining mga senador.
Ang botohay diri, hambalon pa, strictly pamulitika gid lang nga ga-serve lang sang ila personal kag political interests.
Ina tungod ang Impeachment indi man Civil ukon Criminal Case kon diin masukot mo ang akusado sang iya kinawatan kag ma-sentensyahan sing pagka-bilanggo bangod sang iya “high crimes”.
Ang Impeachment Proceeding, sa legal nga pagkilala sang mga abogado, isa ka sui generis, ukon “a class of its own”, kon diin ma-remove lang ang mataas nga public official sa iya pwesto.
Ining “high crimes”, sunu sa Section 2 sang Article XI sang aton Konstitusyon, amo ang “Culpable Violation of the Constitution, Treason, Bribery, Graft and Corruption, Other Crimes, ukon Betrayal of Public Trust.”
Grrrr! Grabe nga mga kasal-anan batok sa mga pumuluyo, matuod! Sa kaso batok kay VP Sara gapanguna dira ang ma-anomaliya nga PhP612.5 nga confidential funds, unexplained wealth, ang wala madeklarar pa nga bahin sang iya Statement of Assets, Liabilities kag Net Worth (SALN), kag ang death threats batok kay PBBM, FL Lisa Araneta-Marcos, kag anay Speaker Martin Romualdez.
Kon madutlan si VP Sara sa Impeachment Trial, luas sa ma-remove siya sa pwesto, mahulugan man siya sang accessory penalty nga perpetual disqualification sa pagbalik sa public service sa idalom sang Civil Service Law.
Ugaling, tungod sang Power to Pardon sang Presidente, katulad ni kumareng Glo, pwede ang akusado mahilway kag makabalik sa poder sa gobyerno!
In fact, na-pardon gid ni kumareng Glo ang babaerong pangulo pagkatapos nga nag-resign ini sa pagka-Presidente bag-o mahiwat ang Impeachment Trial kag samtang nasentensyahan man sang lifetime nga pagkabilanggo sang Sandiganbayan sa kaso nga Plunder. Nangin meyor pa gani liwat ini.
Indi makapati sini ang mga pumuluyo. Apang natabo gid. Natagaan gid siya sang presidential clemency (pardon) ni kumareng Glo.
Kon ma-Pardon gid man, sunu sa iban, si Lord na gid lang ang makahimo sina tungod sang kabug-at sang iya kasal-anan nga dapat mahinulsulan gid anay sini sing tuod-tuod sa malawig-lawig pa nga tinuig.
Tungod sini, segurado nila nga indi pa mabaton ni Lord ang iya paghinulsol agud makabalik sa public service sa ila kulba nga liwat naman ini mangurakot sa kaban sang banwa. Apang ginhimo gid ini ni kumareng Glo nga daw diyos man siya.
Well…sabton na gid lang ina seguro ni kumareng Glo ang iya kasal-anan kay Lord parti sina.
-0-0-0-
Sa aton bahin, indi importante kon ano ang resulta sang Impeachment ni VP Sara – guilty man ukon acquitted sang mga senator-judges.
For sure, sa bahin sang Senado, segurado naton nga ang panindugan sang Senado indi ini tungod sa merito sang kaso kundi sa personal kag political interests gid lang sang mga senador.
Gani manilag lang anay kita kag magkuha sang ideya sa lakat sang mga akusasyon sang Kamara kag sang Senado tubtub sa maakusaran na si VP Sara sa Sandiganbayan, nga basi ma-appeal pa sa Korte Suprema, kon diin may mapatihan na kita nga panindugan legal.
Not excepting, of course, ang kinamatarong sang mga pumuluyo, sa ila sovereign right, nga maghimo sang ila kaugalingon man nga mga conclusion./PN
