SA PAGKADAMO sang mga proyekto nga ginapatuman subong ang Department of Public Works and Highways (DPWH) sa syudad. Ini lunsay mga dalan nga halos dulolongan nga ginpang-obra sang nagkalain-lain nga mga contractors. Manami man kuntani nga madamo ang mga proyekto apang ngaa dulolongan kag kadam-an delayed pa?
Ginabasol ang pagbaha diri sa syudad sa mga road projects nga wala sang kaupod nga drainage. Tanan nga basol ara sa syudad. Ginbasol si Mayor Jose Espinosa III ngaa kuno ginpabay-an ang pagbaha. Ano kuno ang ginahimo sang mga tawo sa city hall nga mga uyaya?
Pero nahibaluan nyo bala nga indi iya sang syudad ang ini nga mga proyekto?
Nahibaluan nyo bala nga panahon pa ni anay Mayor Jed Patrick Mabilog naga-demand na ang city government nga dapat may husto nga koordinasyon ang implementasyon sang mga proyekto?
Sang ginhimo ini sang city government sang una, ginmalisyahan pa sila nga gusto man nila mag-ambit sang papay sang project proponent. Bangud sini ginpabay-an sila sa pagpatuman, ang importante nga mapahibalo ang syudad sang ini nga mga proyekto.
Teh ano ang natabu?
Nagbaha ang syudad bangud sang mga delayed kag kulang-kulang nga mga proyekto. Ang syudad na karon ang balasulon.
Sa tunga sang mainit nga kritisismo sa mga proyekto, ang proponent nagaipoy-ipoy lang sa higad. Wala gid nagbayaw sang kamot agud akuon ang mga palpak nga proyekto. Amo na bala ang hulobaton nga kun sa kaayuhan ipadayaw apang kun palpak, hipsan lang.
Sadtong sabado, sa handum nga mahibaluan ang update sang mga proyekto, nag-conduct sang inspection si Mayor Jose Espinosa III sa Jalandoni water pumping station agud mahibaluan kun bala epektibo ini sa pagpahagan-hagan sang pagbaha sa ugar. Nakita sang alkalde nga epektibo ini bangud nga masarangan sang isa ka makina nga makasuyop sang tubig nga isa ka metriko kubiko kada sigundo ukon isa ka libo ka litro kada sigundo ukon lima ka drum.
Madasig nga naglapta sa social media ang ginhimo sang alkalde. Bangud sini may natandog ang bugal, kag naghulag ang mga galamay agud ipunton nga iya ni Mr. Politiko ang proyekto.
Ngaa, sin-o nagaagaw sang proyekto? Wala man ina gin-agaw ni Espinosa. Anay nga nakita nga maayo ang proyekto nag-girinual dayun sila agud ipabugal nga iya ni Mr. Politiko ang proyekto.
Hay nga mga tawo, mga ipokrito! (jpranco1975@gmail.com/PN)
