NAGAPABILIN nga madamo ang may pagpang-alang-alang nga magpabakuna. Ini bisan nga malapnagon na ang media coverage sa mga nagapabakuna nga mga healthcare workers.
Ngaa ayhan nagakatabu ini? Diin nagkulang ang gobyerno?
Nagapalanusmo na sang palayag ang tanan nga media outlets sa pungsod nga safe kag effective ang bakuna santo sa paathag sang mga experts apang nagakatahap pa sa gihapon ang mga tawo. Masami nga sabat, “Una lang kamo kay kun maayo kami naman.
Sa sini nga higayun, indi na problema ang bakuna. Ang problema amo ang gobyerno nga indi maathag ang mensahe sang vaccination program.
Problema man ang mga tawo nga magpati sa otoridad, mas nagasunod sa nabasahan sa social media ukon nabatian sa komunidad.
Matuod man nga may kahilwayan kita sa pagpamat-ud kun para sa atun kaugalingon. Apang sa sini nga kahimtangan, indi lang ang atun kaugalingon ang dapat pinsaron kundi ang pangkabilugan nga proteksyon.
Ang mabudlay kay kun ano ang una nga natanom sa atun pinsar, mabudlay na nga balion. Sarado na kita sa pagbaton sa mas matuod nga impormasyon.
Pero ngaa ayhan nag-amo sini ang atun kultura subong? Ini kahimuan man sang mga politico kag tawo nga ginahingalitan ang kakulang sang kinaalam sang kadam-an paagi sa pagsabwag sang mga impormasyon sa social media nga makapasalangisag sa tawo.
Ang bunga, mabudlayan na sila sa pagpili sang matuod sa kabutigan. Kun sa pagtinlo pa sang bugas, bisan anhon mo ka lisig, ang pasi waay gid nagapain, sa baylo nagasimpon gihapon sa bugas. Gani mapilitan ka nga bayuhon liwat agud mangin bugas na tanan pati ang pasi.
Kun sa tawo pa, kinahanglan liwat pulpugon ang ulo agud makabugtaw kag mahibaluan ang matuod gikan sa kabutigan.
Ang atun panawagan sa mga politiko, dulogan na ang paghingalit sa pagkainosente sang madamon nga mga Filipino. Dulugan na ang pagsabwag sang patalang sa social media. Makatalagam na ang inyo ginahimo bangud bisan mga may alam, natapikan naman sang tuhay nga pagpati kag panan-awan.
Nahangpan man natun nga ang atun desisyon nasanto sa ano ang ginapatihan. Amo na nga bisan sala ang impormasyon basta makasuporta sa atun ginapatihan, hakson lang kag ipalapnag pa gid sa iban.
Kabay pa nga sa ulihing adlaw, indi ka pagsukton sang imo kabataan kag hambalan ka nga “kadako gid sang imo kakulangan.” (jpranco1975@gmail.com)/PN
