KUN tani lang ang atun gobyerno may maathag nga banas nga ginausoy sa away sang coronavirus disease 2019 (COVID-19) kita man mangin hamtang ang pamatyagan.
Ugaling makita nga sa umpisa pa lang nagapanglaghap na ang Department of Health kun ano ang ila himuon.
Sa pagkadamo sang kapalpakan sang ahensya, sa gihapon may pagsalig sa iya ang administrasyon. Kun sa bagay, siling nila wala ginabayluhan ang heneral sa tunga sang gyera.
Apang kuntani nagapamati man ang atun gobyerno sa sentimento sang publiko indi bilang pagpaidalum kundi mangin ubay sa paghimo sang mga desisyon sa away kontra sa COVID-19.
***
Kun tani lang kita man nga mga pumuluyo mangin masinulondo sa ginamando sang kasuguan nga tumanon ang minimum nga health requirements kontra sa pandemya. Ang syudad sang Iloilo may ordinansa sa husto nga paggamit sang facemask kag social distancing. Apang kun magkadto ka sa mga merkado, may wala nagasoksok sang facemask. May ara man nga sa sag-ang ang mask. Teh sa diin sina ang proteksyon ta?
Kita nga mga nagahalong makalolooy lang sa mga balingag nga tawo.
***
Kun tani indi lang tanan isalig sa sa gobyerno. Halimbawa ang Social Amelioration Program Grant (SAP) nga tuman ka kontrobersya. Magluwas sa indi patas nga pagtumod sang mga beneficiaries, may butigon man nga beneficiaries. Nakabaton na sang assistance sa iban nga ahensya sang gobyerno, malangot pa gid ang buot sa SAP.
Mareklamo apang kun tudluan mo kun paano indi man kay indi gusto magpakilala.
Teh sa diin ang hustisya?
***
Kun tani lang ang gobyerno natun mangin tampad, ang pumuluyo masinulondon apang maisog magpakigbato sang kinamatarong.
***
Kun tani lang, ang gobyerno nagapamati sa tingug sang kadam-an samtang ang mga pumuluyo maalam magtan-aw sang matuod kontra sa kabutigan.
***
Kuntani lang ang mga lider sang pungsod, tampad kag nasentro sa pagserbisyo ang unod sand ulo samtang ang mga pumuluyo maisog magbantay sa kagarukan indi lang sa social media kundi bisan diin dal-on mga palataporma.
***
Kun tani lang kita tanan mas labaw ang matarong kun ipaanggid sa kapaltahan para sa matuod nga kauswagan
***
Kun tani lang!/PN
