LABAY MAN AKON

‘Ang bantay’

SA KADAMUON sang papel (role) nga ginauyatan naton, ang labing mabudlay kag makabig nga demanding amo ang mangin bantay. Sa abaga sang bantay ang kaayuhan (well-being) sang tagsa ka katapo sang pamilya, clan, komunidad o organisasyon.

Ang mangin bantay o tagabantay sang isa ka pamilya o organisasyon, indi malikawan. Kon kaisa, gina-assign ini sa aton
Kon malikawan lang, indi ako maluyag nga mangin bantay bangud sang katungdanan (responsibilities) nga naupod sini.
Mahapos nga kabigon nga “lowly” o ordinaryo lang ang mangin bantay. Pero, indi. Nagakinahanglan ini sang kaisog sang buot. Nagakinahanglan man ini sang kaalam kag wisdom para ma-carry out ang ulubrahon (tasks.) Experience kag seguro kinahanglanon man nga may yara ka nga proper training para mauyatan ang responsabilidad.

Kasubong na lang abi sang character ni Kathryn Bernardo nga si Malia sa “La Luna Sangre” nga nagakinahanglan sang “maturity” agud mapangapinan ang iya lahe kontra sa mga mapintas nga mga bampira. Kinahanglan niya nga mag-mature sa natalana nga panahon kay kon indi, kaangay lang siya sa “hinug sa pilit.” (Ang “La Luna Sangre”, of course, amo ang ikatlo nga installment sang hit fantasy franchise sang ABS CBN makaligad sang “Lobo” kag “Imortal”.
Natagna na ang kadalag-an ni Malia bilang tagabantay kontra sa evil vampire nga si Sandrino. Apang ina balantayan pa ang mga masunod bangud naganugod pa lang ang estorya.

Mabudlay nga ipamilit kon kulang.
Por ehemplo, masobra napulo ka adlaw nga ginbaylo ko ang akon katungdanan bilang empleya agud maglingkod bilang bantay sa akon nagamasakit nga iloy sa hospital. Literally, i-swap mo ang imo office ID sa name tag nga “bantay”.
Matuod nga bastante sang nurse kag doctor ang hospital para magmonitor sang kahimtangan sang pasyente. Pero nasandig sa pagkaalisto sang bantay ang pag-ayo sang nagamasakit.

Sa tion nga ma-confine ang masakiton sa hospital, he/she ceases to be the strong person that he/she is. Bisan pa kon si sin-o siya nga policymaker o decisionmaker. Bisan siya pa ang director sang isa ka opisina. Bisan pa nga doctor siya. Pasyente gihapon ang pagkabig sa iya. Magadangup siya ghapon sa bulig sang iya bantay. Ang labing maayo nga himuon amo ang pagpaukoy kag pagpangabay sang bulig sang iban bangud indi ka na makahulag. Labi na gid nga magpatigayon pa sang imo kaugalingon nga kinahanglanon.

Matuod nga may mga medical staff nga nagaasikaso sa pasyente, ang bantay ang nabilin sa pagpatigayon sang tanan – halin sa pagbayad sang fees para sa medical laboratory o examinations, mga balaklon nga bulong kag pagtawag sang atensyon sang nurses station.
May mga kahigayunan nga i-bed pan pa ang pasyente para makapangihi. Pailisan. Sibenan kon kinahangalan gid. Paimnon. Pakan-on nga magakahulugan, kon kaisa, nga hungiton.
Kon ang medical staff ara sa pag-attend sa needs sang pasyente, ang bantay kinahanglan 24/7 nga nakaalalay lang sa nagamasakit. Maayo kon may shifting kay ang bantay ginakapoy man. Ginatuyo kag kinahanglan man nga magtulog. Apang ang kahimtangan indi ideal para sa iban kay kasubong sa mga pasyente nga yara sa probinsya kag ang pamilya malayo sa syudad o banwa sa diin nahamtang ang mga bululngan sang gobierno, sa masami nagaisahanon lang ang tagbantay.
Gani sa masunod nga kamo magakinahanglan sang serbisyo o bulig sang bantay, hatagan sila sang respeto bangud indi hamak ang mangin bantay. (runjirjamolo@gmail.com/PN)

LEAVE A REPLY

Please enter your comment!
Please enter your name here