Mangin handa agud indi maghinolsol

ANG KAKULBA sang publiko bangud sa coronavirus disease 2019 (COVID-19) nagaalalawas.

May panic buying sang mga masks, hand sanitizers, alcohol kag tissue.

May mga nagapasobra pa sa bili sang ila baligya.

Normal ini nga reaction sang tawo kun kulang ang ihibalo sa isa ka bagay ilabi na kun balati-an.

Sa Iloilo City government madamo na sang mga tikang nga ginapatuman. Kaangay man sini ang ginahimo sang gobyerno probinsyal.

Matyagan ko mas madasig pa ang hulag sang syudad kag probinsya kun ipaanggid sa hulag sang national government.

Ang syudad sang Iloilo temporaryo nga nagpanirado sadtong Huwebes, Marso 12, agud makapaninlo.

Maayo ini nga tikang bangud may mga empliyado nga makabig nga persons under monitoring (PUM).

Ugaling problema lang kay kulang ang protective equipment sang sanitation team. Ang iban nagatsienelas kag wala pa sang gwantes.

Subong man, maayo na lang ini kay gahimakas ang syudad nga matinluan ang city hall. Pero kun tani ginkumpleto man ang gamit kay health security ang ginahambalan.

Sa pihak nga bahin indi malipat nga kanselado na ang flag-raising ceremony sa city government kada Lunes. Ini kabahin sang memorandum ni Mayor Jerry Treñas agud makalikaw sa transmission sang COVID-19.

Sa baylo nga biometrics, logbook na lang ang pamaagi sang pagkuha sang attendance sang mga empliyado sang city government.

Ginamando sang memorandum circular nga ginpaggwa ni Mayor Jerry Treñas nga magapaninlo sang taglima ka minutos kada alas 9:00 sang aga kag alas 3:00 sang hapon. Ini man ang ti-on sang pagpangamuyo sang mga empliyado sang syudad.

May nakahanda man dapat nga 70 percent alcohol solution para sxa nagasulod kag nagaggwa nga mga empliyado.

Dapat magdala sang sanitizers ukon alcohol ang mga empliyado.

Ginapanugyanan man ang mga empliyado indi mag-share sang pagkaon ukon maghulamay sang mga utensils.

 Ang mga nagamasakit nga empliyado dapat ara lang sa ila balay kag magkuha sang health clearance antes magbalik sa opisina.

Sundon ang coughing/sneezing etiquette.

Likawan ang pagtandog sang kamot sa guya, mata, ilong kag baba.

 Magpalayo sa mga tawo nga nagamsakit.

 Ginamando man sa mga empliyado nga likawan ang local kag international travels. (jpranco1975@gmail.com/PN)

LEAVE A REPLY

Please enter your comment!
Please enter your name here