Manyak-manyakon nga drayber sang taksi

SA KABUG-USAN, gapati kita nga ang mga drayber sang taksi sa siyudad sang Iloilo mga matarong – may respeto kag maabi-abihon sa mga pasahero, honest, mabinuligon, indi oportunista sa pagpanukot,  indi bastos, kag wala sing kriminal nga panghuna-huna.

Bisan amo pa ina, dapat indi kita malipat ugaling sa pag-amlig gihapon kay may pila gid dira nga man-og sing batasan.

Katulad sadtong drayber sang taksi nga gin-reklamo sang isa ka dalagita nga binastos siya kag pilit nga dalhon sa isa ka motel.

Ang biktima ga-edad lang sing 15 anyos. Mapauli tani ini sa Sambag diri sa siyudad sang Iloilo halin sa SM City dira sa Mandurriao. Mga 3:45 sang hapon sang Biyernes yadto sang magsakay siya sa taksi.

Matahum ang dalagita, kag luyag seguro sang dyablo nga drayber tentaron sang binastos nga istorya. Kinulbaan ang dalagita, apang wala siya magpahilom sang iya kulba samtang nagadalagan ang taksi. Nagyuhom-yuhom lang siya nga naghulat sang husto nga tion agud makapalagyo.

Nadugangan ang iya kulba sang ginliku sang drayber ang taksi pakadto sa Queen’s Court sa Mandurriao. Kilala ini nga palahuwayan sang mga pareha nga luyag maghimo sang indi amo.

Nagsiling pa gani ining drayber sing: “Madali lang kita a!” nga nagabarangisi.

Gani, sang magpondo ang taksi sa ganhaan sang motel agud magsulod na, gilayon salida sang dalagita sa paggwa sa taksi. Dayon sini dalagan pakadto sa gwardya sang motel agud mangayo sing tabang.

Hinali nga nalagyo ang drayber apang nakuha sang dalagita ang body number sang iya taksi. Tungod sini, na-trace siya sang mga pulis.

Nag-abot man ang isa ka tanod sang barangay kag gin-updan ang dalagita sa barangay hall agud formal nga magreklamo.

Sang madakpan kag mahunong na sa Mandurriao Police Station, nagbalibad ining drayber nga siya ang ginsakyan sang dalagita. Indi niya ugaling ma-deny kay na-picturan sang dalagita ang body number sang iya taksi.

Manyak matuod! Dapat sabton ini sang kumpaniya sang taksi kon ngaa naka-hire sila sining manyak-manyakon nga drayber. Dapat naseguro man sang kapulisan kag NBI kon ano ang bug-os nga karakter sang drayber, indi lang diri kundi sa iban pa nga lugar, kag kon may criminal record indi ini pagtagaan sing clearance.

Nanotaran ko man nga may mga taksi nga ang ga-kontrol sa pagbukas kag pag-lock sang pwerta amo lang ang drayber.

Dapat tagaan man ang pasahero sang kinamatarong sa pag-kontrol sa pwerta sang taksi agud may oportunidad ini sa pagpalagyo kon matabo.

Isa pa, dapat sa pagsakay pa lang sang pasahero nahibal-an na niya ang pila ka importante nga bagay.

Dapat mahibal-an na sini bisan ang ngalan kag body number man lang sang taksi.

Ipahibalo sa pamilya ukon sin-o nga matugyanan, paagi sa celfone – kag kon wala sing celfone ang mag-pretend nga gatawag sa celfone – ang ining mga impormasyon nga ginalawag sing matonog sa palamatin-an sang drayber.

Sa sini nga paagi, indi na makapamensar ang drayber sang kon ano pa nga kalainan nga pwede niya maisip. 

***

PASIPLAT

Interesting Facts About West Visayas

By Atty. Rex S. Salvilla+

(President: Iloilo Historical Association and West Visayas Historical Research Foundation, Inc.)

‘Sports and Recreation – Post War’ – Part 5

(Halin sa Book 7, pahina 17-18)

Sa Chess:

* Eugene Torre sang Iloilo City – 1st Asian Chess Grandmaster sang ginlutos niya si Russian Grandmaster Anatoly Karpov sa 21st Chess Olympiad sang Pransya

* Rosendo Balinas sang Bacolod City – Ikaduha nga (2nd) Asian Chess Grandmaster

Sa iban nga Field (paindis-indis):

* Percival Alger sang Alimodian, Iloilo – 14th SEA Games champion sa Fencing

* Pamela Denise Cababasay – Gold sa World Taekwondo Festvial sa Taiwan, 5th Korean Open sa Chung Cheong, Korea sang 2002, kag 11th US Open sa Florida, United States. Una nangin PRISAA champion.

* Arnold V. Lacson sang Molo, Iloilo City – Ikaduha (2nd) top water skier sang Southeast Asia sang 1979

* Judy Joy Pasaporte – champion sa women’s division sang 1991 Philippine Airlines Manila Marathon kag record breaker

* Arlene Rodillado sang Molo, Iloilo City – 1961 Southeast Asian Games women’s air rifle shooting champion

* Kaye Cabalatugan sang La Castellana, Negros Occidental – 2002 World Shoot XIII Champion sa Petersburg, South Africa

* Nelson Uygongco – nagdaug 6 ka gold sa 2002 World Shoot XIII sa Petersburg, South Africa. (May kasugpon) ([email protected]/PN)

LEAVE A REPLY

Please enter your comment!
Please enter your name here