MASADYA ang politika sa probinsya. Sigurado gid nga mainit ang sungay nga matabu sa tunga sang mga Defensor kag Biron. Ini subong away sang kwarta kag nadihon nga legasiya. Ano ayhan ang mangibabaw?
Sang makaisa, nagbalintuwad na si Cong. Ferj Biron kag Gov. Defensor sa ila agaway sa renda sang probinsya. Ugaling siling sang mga political tsismoso lain man ang amay sa anak gani mangin mainit ang away sa maabot nga 2019 elections.
Gaagaway sa karon sanday Defensor kag Biron sang mga distrito agud makuha nila ang suporta. Kun si Biron, iya na kuno ang 1st, 2nd kag ang iya kaugalingon nga 4th District samtang ang nabilin nga 1st District iya ni Defensor kag ang balwarte sini nga 3rd district. Pero diin gid ayhan ang suporta sang mga natungdan nga distrito?
Una ang 1st District sang mga Garin – Ang mga Garin kaalyado ni Defensor sang nagligad nga 2016 elections. Pero suno sa impormasyon, nagpangayo sang suporta ang mga Garin kag Biron nga dal-on si Vice Governor Christine Garin sa 4th kag 5th districts nga wala naman ginbalibaran ni Biron. Ini mangin utang nga kabalaslan sang mga Garin kag ang mga Garin kilala nga nagatan-aw sang utang nga kabalaslan.
Ikaduha ang 2nd District sang mga Gorriceta – Sila kaalyado gid sang mga Defensor pero may nagasiling nga nagtuman sang ginkasugtan si Cadio nga kun sin-o ang suportahan sang mga alkalde sa isa nila ka pagtililipon amo ina ang iya suportahan.
Ang 3rd District kag 4th District indi ta na paghambalan kay balwarte na ina sang tagsa tagsa.
Ang 5th District amo ang posible mangin alagawan nila. Ugaling halin sang nagligad daw maki-Defensor ang Quinto. Ugaing lain naman subong kay ang ila kongresista dira kaalyado ni Biron.
Tama ka-fluid ang sitwasyon. Kun kampante si Defensor, si Biron nagabakas na sa iya makinarya sa mga kabanwahanan. Indi dapat nga magsalig si Defensor bangud lain man sya sa iya anak. Basi makibot sya, nagbaliskad ang paya kun sa hulobaton pa sang mga tigulang.
Ang maayo lang kay bisan sin-o ang magdaug sa ila wala gid sang dapat kabalak-an ang mga Ilonggo. Ina bangud pareho man sila nga may maayo nga track record kag wala sang isyu sang pagpangawat sa kaban sang banwa.
Mabudlay ang pagpili sa ila nga duha bangud pareho sila nga may ikasangkol. Ti kun mag-amo sini, ang padaug amo ang kabakas manglamano kag magsabwag sang grasya sa tawo. (jpranco1975@gmail.com/PN)
