MADAMO ang nagapamangkot kun ngaa masanag ang Iloilo Provincial Capitol pero madulom ang Iloilo City Hall.
Nagakilinabit ang mga lanterns sa dalan kag plaza, ngaa sa ctiy hall pila lang kabilog ang nagakabit sa entrance? Kun gab-e madulom gid ang city hall.
Ang provincial capitol naggasto sang dako para sa pagpasanag sang palibot. Wala lang kita idea kun pila pero sa katahum pa lang, sigurado nga dako ang pondo.
Ang syudad sang Iloilo Nobyembre pa lang nagpasiga na sang mga parol sa dalanon kag plaza. Ini tanan gasto sang pribado nga sektor kag wala sang ginpaggwa nga pondo ang syudad.
Matahum nga programa bangud napasanag natun ang syudad subong nga Paskwa sa bulig sang pribado nga sektor kag wala na naggastuhan pa ang atun syudad. Kaangay sini nga mga programa ang dapat sundon. Ilakip ang pribado nga sektor sa mga hilikuton agud kun may galastuhan nga ila masarangan indi na mabudlayan ang gobyerno. Ang pondo mahimo pa maggamit sa iban nga proyekto.
Apang ngaa wala ginsakop ang city hall sa pagpasanag? Sang nagligad nga tuig bisan paano nagsanag ang city hall bangud sang ginpangbutang nga mga suga bisan simple lang. Indi kaangay subong nga magkadto ka sa Plaza Libertad masanag, pero ang background nga city hall madulom. Kuntani bisan simple lang ginpasanag man ang city hall.
Kunsabagay, okay lang man ina, importante masanag ang Paskwa sang mga empliyado sang syudad bangud may bonus sila nga P26,000 kag sigurado na ang salary increase sa masunod nga tuig. May mga bagay nga indi malambot, pero may mga bagay man nga mahatagan sang katumanan. Kun sa hulubaton pa, Indi tanan nga ginahandum malambot pero may ginahatag man nga kabaylo.
Kabay nga sa masunod nga tuig magasanag man ang city hall kaangay sang kasanag sang palaabuton sang syudad sa maayo nga liderato ni Mayor Jerry Treñas. (jpranco1975@gmail.com/PN)
