Malayo pa ang umpisa sang adlaw sang kampanya pero grabe na ang pang-itanay nanday Cong. Jerry Treñas kag Mayor Jose “Joe” Espinosa III.
Sila ang ginakabig nga front runner sa pagkaalkalde sa syudad. Magbilas man sila nga duha bangud mag-utod nga Sarabia ang ila mga asawa.
Kasan-o gid bala nag-umpisa ang initay sang duha?
Sa matandaan natun nag-umpisa ini sang nagdeklarar si Treñas nga magapadalagan sya sa pagkaalkalde sang syudad bangud ginaduso sya sang mga kapitan. Ini lang ang atun nga madumduman nga okasyon nga ginsuguran.
Pero ayhan, sa ila pinamilya nga pagtililipon nag-umpisa ini sang nagpabatyag si Treñas nga magabalik sya sa syudad bilang alkalde.
Sugod sadtong Marso, daw tayuyon na ang pang-it ni Treñas kay Joe III. BIlang balos, nagkalapulak naman ang mga job hires nga kuno kadampig ni Treñas. Bisan ang mga regular employees ginpa-recall sang syudad kag ginpabalik sa ila mga talatapan.
Sang nakaligad nga filing sang certificates of candidacy (COC), simple lang ang mga tirade ni Joe III sa iya bilas. Wala pa abi natapos ang filing sang COC sang grupo sang alkalde, nagpaggwa na sang pahayag ang kampo ni Jerry nga nagpangbayad lang agud may mag-upod sa iya parade.
Sabat sang alkalde, ang kampo ni Treñas ang nagapangbayad agud may mag-upod sa ila.
Sang tyempo na sang grupo ni Treñas nga mag-file sang COC, halos bug-os nga interview kay Treñas kag speech sa atubang sang iya mga supporters lunsay lang pakanubo kag pakahuya kay Joe III. Gintawag niya nga palahubog ang alkalde kag wala sang plano para sa syudad. Siling pa ni Treñas, naghinolsol sya nga si Joe III ang ginbuligan niya sang nagbungguanay sila ni anay councilor kag karon congressional candidate Jam-jam Baronda sa pagkabise alkalde.
Bilang sabat, gintawag naman ni Joe III nga butigon si Jerry. Pasumpa-sumpa pa kuno ini nga indi na magdalagan, gale kay kun magtalikod sya nagangisi ang kongresista.
Gintawag pa ni Joe III nga butigon si Jerry. Hambal ni Joe III, indi magpatama sang ugtas si Jerry kay malawig pa ang election; wala pa gani nakaumpisa ang kampanya.
Bilang isa ka outsider daw masakit sa dughan pamati-an ang away sang magbilas. Kun makahaboy si Jerry sang masakit nga tinaga kay Joe III daw wala sang balor ang bilas.
Kun pamati-an mo si Jerry daw wala na sang bwas kag daw wala na sang posibilidad nga mag-uliay ang ila buot. Ano na lang ayhan ang reaction sang ila mg kabataan?
Masubo gid ang dalit sang politika. (jpranco1975@gmail.com/PN)
