BY THE WAY, sa mga abyan naton nga luyag maglakat-lakat sa 300-m nga dust road pasulod diri sa Panay News Compound Area kon diin kami nagapuyo, sa adlaw lang kamo anay magduaw diri.
Man, ginpatyan kami diri tal mismo sang tag-iya sang “idle land” pasulod sa amon diri sang suga sa poste sadtong Biyernes.
Mga 30 anyos na kami nagapuyo diri sa sulod nga ang mga lote amon tanan nabakal kag napanag-iyahan na.
Napasudlan na kami diri sang MIWD (karon MPIW) water sa kaalwan ni anay Mayor Mansueto Malabor kag MIWD chairman Larry Jamora, kag suga sa poste sa una nga kahigayunan ni anay Kap Aparicio sadtong circa 1995 pa, nga padayon nga ginpasugtan sang una nga tag-iya (Diaz Family).
Kag karon, ginpapatyan na kami sang suga diri sa alagyan namon pagwa/pasulod sa main road
sang nagbulos nga tag-iya.
Tani mabuligan kami sang palangga namon nga Mayor Raisa nga mabalik ining amon suga diri, kon diin kon kis-a may gauru-aswang nga mga stalker, kag mahatag na sing lubos ang paggamit sining 300-m nga dust road sa amon. Pwede, Mayor?
***
GIN-CONFIRM ni Acting DOJ Secretary Frederick Vida sadtong Enero 21 nga si DPWH District (Bulacan 1st District) Engr. Henry Alcantara yara na sa idalom sang Witness Protection Program (WPP) kag sa kustodiya na sang Dept. of Justice.
Nabaton siya sa WPP upod sa duha pa ka DPWH officials kag isa ka contractor sadtong Enero 15 angot sa ginaalegar nga ma-anomaliya nga flood control projects.
Ang tatlo pa amo sanday DPWH Usec Roberto Bernardo, Engr. Gerard Opulencia kag contractor Sally Santos.
Ang maunod nga testimonya sining apat, sunu kay Vida, kinahanglan gid agud ma-expose ang mga “accountable” sa flood control project anomalies, labi na gid ang mas mabangis nga mga buaya, kag ang mga padihot (schemes) nila nga makatudlo sa mga otoridad kon paano matapna kag indi na matabo liwat ang kasubong nga mga corrupt practices.
Baylo sa panestigo sining apat sa idalom na sang WPP, sunu kay DOJ Secretary Vida, mapawala man ang ila salabton criminal.
***
Meantime, na-revoke na sang Professional Regulatory Board of Civil Engineering (PRBCE), sa idalom sang Professional Regulatory Commission (PRC), sadtong Enero 12, 2025 ang professional license ni Engr. Alcantara bilang Civil Engineer.
“Found guilty” si Alcantara, sunu sa PRC, sang “gross unprofessional and unethical conduct” bangod sang iya “self-confessed involvement” sa non-existent and substandard” nga flood control projects sa Bulacan.
Na-establisar sang PRBCE nga wala sing pangduha-duha (willfully) nga gin-aprubahan ni Engr. Alcantara ang pagbayad para sa sining mga “ghost projects”, isa ka buhat nga naga-constitute sang “severe breach of the Code of Ethics for Civil Engineers” kag “betrayal of public trust,” dugang nga paathag sang PRC.
Angot diri, na-turnover na gani ni Alcantara sa Dept. Justice ang sobra sa PhP181 ka Milyon bilang una nga kabayaran sang mga PhP300 nga ginbulsa niya nga mga kickback halin sa flood control projects.
***
Sa kaso ni Bernardo, gin-expose niya sa Senate Blue Ribbon Committee (SBRC) ang pag-areglohanay sa Kamara sang mga kongresista kag mga regional kag district engineers kon ano ang mga “allocable” nga mga proyekto nga natugyan sa DPWH kag kon diin ini natalana sang National Budget nga naaprubahan na sang Presidente.
Kag diri na natabo ang pag-areglohanay kon ano ining mga proyekto kag kon diin ini matupa sunu sa luyag gid sang mga kongresista baylo sa kickback (masami 20-25%) nga mahisugtan kag partidahon sang proponent nga kongresista kag sang nag-otorisar nga DPWH official.
Ang malain pa kay kon kis-a ma-report pa nga “completed” ining mga proyekto gali wala ga-existir, ukon ghost project. Kag kon trabahuon man, substandard kay indi na kaigu ang galastuhon ikumparar sa orihinal nga pondo.
***
Sa kaso naman ni Engr. Gerard Opulencia, nga former DPWH National Capital Region regional director, gin-aku sini ang iya kasal-anan kag nag-turnover sang mga PhP40 ka Milyon nga nagpahapos man sang iya pagsulod sa WPP.
Sunu kay DOJ Sec. Vida, ining PhP40 ka Milyon pauna lang ini nga pagbalik sang mga PhP150 ka Milyon nga nabaton niya nga kickback.
Samtang, si contractor Sally Santos nag-uli man sang mga PhP15 ka Milyon sa Kaban ng Bayan, bilang pauna nga “restitution” sa iya man involvement sa ma-anomaliya nga flood control projects, sunu kay DOJ spokesperson Polo Martinez.
Si Santos amo ang tag-iya kag manager sang SYMS Construction Trading.
Gin-admitir ni Santos ang pag-deliver, bilang “overprice” seguro sang mga materyales, sang mga PhP245 ka Million “in cash” sa sulod lang sang isa ka adlaw sa upisina sang DPWH.
Ginsiling niya nga, sa kabug-usan, basi naka-deliver siya sa DPWH sang mga PhP1.0 ka Bilyon na sugod sadtong 2022 tubtub sining ulihi lang niya nga pag-deliver sang kwarta sa DPWH.
***
Samtang si SBRC chairman Panfilo Lacson nagapati nga sobra sa PhP180 ka Bilyon sang public funds ang nawaldas (wasted) sa “ghost projects” sugod sadtong 2016.
Sunu man kay Lacson kag Senate finance committee chair Sherwin Gatchalian, sa 10,000 ka proyekto nga na-review nila, mga 600 gid ang “ghost” ukon “nonexistent” nga mga proyekto./PN
