TION yadto sa pungsod sang padayon nga peace talks sa tunga sang gobyerno kag Muslim rebels para sa malinong nga pagpakigpuyo sang mga Muslim upod sa mga Kristiyano, kon diin ginaistoryahanan na ang Bangsamoro Basic Law sa idalom ni Presidente Aquino.
Tion man ato nga nabantugan ang Davao City sa idalom ni anay Mayor Rodrigo Duterte bilang isa ka malinong nga siyudad. Diri, wala kuno sing dalagku nga mga kriminal kag maisip mo lang ang madakpan nga naga-droga.
Tungod bala kay madamo diri sang mga trabaho agud indi matentar ang mga tawo sa paghimo sang krimen agud mabuhi?
Ukon nahadlok lang ang kon sin-o man nga may kriminal nga panghuna-huna sa salsalon nga kamot kag wala patawad nga pagdumala ni Duterte?
Ukon, sa may uslitan nga panghuna-huna, tungod bala kontrolado sang sindikato ang mga negosyo diri nga wala man sing reklamo kay padayon man ang ila maayo nga kita?
In fact, panahon man ato sang indi gihapon matapna nga problema sa droga, kriminalidad kag korapsyon sa gobyerno sa aton pungsod, nga tubtub subong handom sang tanan nga tani mahimo sang kon sin-o nga makapasalig sa ila.
Tion man ato sang pagpatigayon sang gobyerno sang Oplan Exodus agud tultolon kag arestohon ang mga high-ranking terrorists nga nagapanago sa isa ka barangay sa Mamasapano, Maguindanao.
Ginpatigayon ining “daring mission” sang kaagahon sadtong Enero 25, 2015.
Nangin mabungahon ini sa pagkapatay sang terorista kag experto sa paghimo sing bomba nga si Zulkifli Abdhir. Masakit lang ugaling kay ang kabaylo sini amo ang kabuhi sang 44 ka myembro sang Special Action Force (SAF) sang PNP, bisan pa dala man nila sa ila kamatayon ang kabuhi sang 18 ka myembro sang MILF kag BIFF nga nakigsumpong sa ila.
Ginbasol diri sang mga pumuluyo, labi na sang mga pamilya sang Fallen 44, si Presidente Aquino kag DILG Secretary Mar Roxas.
Kag wala na madayon ang pag-aprubar sang Kongreso sang Bangsamoro Basic Law. Naaprubahan lang ini sang ulihi sa panahon ni Presidente Duterte.
***
Malapit na sadto ang eleksyon sang Mayo 2016. Kag nangin daku ini nga isyu batok sa kay Roxas kag iban nga kandidato ni Aquino.
Napierde gid si Roxas sa iya pagdalagan sa pagka-Presidente. Samtang, gin-updan kag ginpili man sang mga pumuluyo ang pasalig nga “milagro” ni Davao City Mayor Rodrigo Duterte sa away batok sa droga, krimen kag korapsyon sa gobyerno.
In fact, lubos na gid napierde ang mga kandidato ni Aquino sa eleksyon sang 2019.
***
Wala ugaling natabo ang “milagro” nga ginpasalig ni Presidente Duterte. Kon may natuman man nga “Duterte goals” wala ini makapalipay sa mga Filipino. Tungod taliwas gali ang pagpatuman sini sa “values” sang mga Filipino nga maka-Diyos, may pagtaha sa kabuhi sang tawo, kag may pag-respeto sa “rule of law” kag Demokrasyahanon nga pangabuhi.
Karon gani lakip ini sa mga isyu batok sa mga kandidato ni Duterte sa Mayo 2022 nga eleksyon.
Kuno matapna niya ang drug menace sa sulod lang sang anom (6) ka bulan. Lima na ka tuig ang nagligad, yara pa gihapon ini kag naglala pa gani.
Kuno tapnaon niya ang kriminalidad, pero ang istastika nagasiling nga nagtaas pa gani sing 60% ang “murder cases”, nga madamo sini matudlo sa mga riding-in-tandem nga ang suspetso matudlo sa mga vigilantes kag ang Duterte Death Squad.
Kuno tapnaon ang korapsyon, sus a! Pati gani ang pagbakal sang pandemic supplies gin-entrahan pa sang korapsyon sang mga pila ka tauhan kag abyan ni Presidente. Imagine, P625,000 lang ang kapital, sobra P8 ka bilyon nga pandemic supplies ang nadaug sa bidding!
Madamo man ang pinatay – sobra 10,000 – sang mga trigger-happy nga mga pulis sa sugo niya nga “Kill! Kill! Kill!”.
In fact, nagaatubang si Presidente Duterte sang kaso nga “crimes against humanity” nga gina-imbestigahan sa karon sang International Criminal Court.
Gina-protestahan man ang kulang nga pagkabalaka sang gobyerno ni Duterte sa kahimtangan sang mga medical frontliners agud lubos sila maprotektahan kag matagaan sang nagakaigu nga mga benepisyo samtang ginahalad ang ila kabuhi agud mabuligan ang mga biktima sang Covid-19.
Samtang, halos indi man mahibal-an sini kon paano suportahan ang pangabuhi sang kadam-an, nga madamo sini nawad-an sing trabaho, kag kon may tabang man kakurampot lang./PN
