Isa ka tiklod na lang kag mahulog na sa pulungkuan. Nagatibi na ang iya buli sa bangku nga iya ginapungkuan kag kon indi siya makapanimbang sigurado nga malagapak siya sa salog nga iya pagatup-an.
Naga-uyog na ang palasyo. Nagakahulog na ang mga salaligan nga tawo. Nagakambyuhanay na sila sang pwesto agud masiguro nga ang ganhaan indi mabihangan.
Nabatian naton ang hambal ni Presidente Bongbong Marcos nga ang mga nadalahig sa iskandalo sang korapsyon magapaskwa sa sulod sang karsel. Sa akon paglantaw, ginahambal niya ina sa iban nga tawo kag nalipat siya nga siya mismo ang ulo sa burukrasiya nga iya ginadumala.
Ginbuyagyag ni Senior House Deputy Minority Leader kag Caloocan City 2nd District Representative Edgar “Egay” Erice sa iya masingkal nga privilege speech sa House of Representatives sadtong Lunes, October 6, 2025, nga naga-akusar sa mga katapo sang 19th Congress sang malapnagon nga korapsyon kag fund diversions nga nagtuga sang kaakig sang publiko.
Suno sa iya, ang 19th Congress nag-divert kag nag-insert sang kabug-usan nga P1.45 trillion sa pondo sa sulod sang tatlo ka tuig nga gintawag niya nga pinakadaku sa maragtas sang kongreso.
Suno sa iya nga indi malain ang insertions kag diversions apang gin-abusuhan.
Ginkatingala sini nga wala nagasapak ang Presidente sa nagakatabu.
Nagsabwag sang panuaron si former Rep. Zaldy Co. Ginpatpat niya ang natabu, kon sin-o ang nagbenepisyo sa insertion, kon pila ang nagkadto sa ila bulsa sang mga naghimulos sa pondo sang pungsod. Ginpamatud-an niya ang panaysayon ni Orly Guteza, nga nagtestigo sa Senado tuhoy sa ila pagdul-ong sang mga ‘basura’ ukon maleta nga puno sang kwarta sa puluy-an ni anay Speaker Martin Romualdez.
Gingiyahan ni Co si Senador Ping Lacson nga usisaon ang mga dokumento nga iya ginbalhag a iya Facebook account tuhoy sa ginasiling nga P100B insertion. Ginkumpurmar ni Lacson nga may nakita siya nga insertion apang ginpangapina niya si PBBM sa pagsiling nga nagkadto ini kanday Presidential Legislative Liaison Office Undersecretary Adrian Carlos Bersamin kag Education Undersecretary Trygve Olaivar nga lunsay nagbiya na sa pwesto. Gingamit lang kuno sang duha ang ngalan sang Presidente para matigayon ang insertion.
Naglagabong sa palamatin-an sang mga Pilipino ang ginbuyagyag ni Senator Imee Marcos nga nagagamit sang ilegal nga druga ang iya utod kag ang asawa sini nga si Liza.
Mismo ang magulang na ang nagtuad sa ginahimo sang iya manghod nga paggamit sang makahalalit nga druga. Nagapamatuod ini sa mga nauna nga sugilanon nga ginbungat sadto ni former President Rodrigo Duterte.
Madamo na sang likom nga nabuyagyag. Madamo sang pasuni nga nakumpirmar.
Amat-amat na nga nagakadula ang salig sang tawo tungod sa wala sang athag nga akto. Magluwas sa mga nakalipas nga mga pagtililipon kag pagpautwas sang hibubun-ot batok sa gobyerno. Balantayan naman ang Nobyembre 30 kon sa diin mas madamo, mas masangkad, mas lapnagon nga hublag-protesta ang ipatigayon sang magkatuhay nga grupo nga nagasinggitan nga dapat may manabat na, may nakasuhan na, may athag na nga resulta ang imbestigasyon.
Nagakadula ang salig sang pumuluyo sa ginahimo nga imbestigasyon nga ginakabig pang-atrasar lamang kag pampakalma sa nagasingkal nga balatyagon sang banwa.
Nagakadula ang salig sang tawo tungod maabtik magpasaka sang kaso ang gobyerno sa iya kritiko kag kasumpong apang kon iya kaalyado daw kaangay nga ginadribol kag gina-unyat ang panahon.
Nagalantaw ako nga indi maabtan sang paskwa kag magkalatangtang ang mga salaligan sa ila pwesto. Magabiya sila agud indi maagsikan sang lutak sang korapasyon sa gobyerno.
Ayhan, matuod ang siling ni Digong nga mangin kaangay si PBBM sa nadangtan sang iya amay?
Panahon ang makasugid, apang ang makatulod agud nga magdasig ang sitwasyon amo ang pagkadula sang salig sang pumuluyo.
Indi mapunggan nga madula ang salig sang tawo sa sini nga administrasyon tungod malawig na ang panahon nga naglipas apang wala pa sang pulitiko nga napasakaan sang kaso.
Wala sang kontraktor nga makapalapaw sa iya ginapatuman nga proyekto kon wala sang kunsabo nga trabahador sa gobyerno. Wala sang mangisog nga trabahador sa goyerno kon wala sang pulitiko nga nagapasalig sa iya nga himuon ang tinonto.
Wala sang may magagwa nga pondo kon wala sang may nagpirma. Wala sang proyekto nga mapondohan kon wala ginpainan.
Ang tanan nga kumpas yara sa ibabaw, ang tanan nga kutaw yara sa idalom.
Ang padayon nga pagbulubalibad, paglikaw-likaw, kag paglingaw-lingaw sa malapnagon nga korapsyon makapadula sang salig sang pumuluyo sa gobyerno. (bertladera@gmail.com/PN)
