Ni Cyrus M. Garde
Syudad sang BACOLOD – Naga-agnas na ang bangkay sang isa ka lalaki nga nasulod sa sako sang nasapwan sa bubon sa Brgy. Santol, Binalbagan, Negros Occidental sang tinalikdan nga Domingo.
Ang biktima nga ginkilala kay Jonel Esparagoza, 27 anyos kag residente sang nasambit nga barangay, ang madugay na nga ginapangita sang iya mga utod.
Ang bubon naman sa diin nasapwan ang biktima nahamtang mga 200 metros halin sa puloy-an sang mga Esparagoza.
Ginapatihan sang mga utod sang biktima nga ginbunu ini kag ginsulod sa sako kag gintagbong sa bubon.
Ginkilala naman sang mga pulis ang suspek nga si Joseph Lucrecio, 19 anyos.
Sunu kay Senior Inspector Albert Sy sang Binalbagan PNP, paglalisay ang ginhalinan sang insidente samtang naga-inom ang biktima kag mag-utod nga Joseph kag Genesis Laurencio sadtong Hulyo 5.
Pero si Genesis nanginwala nga may kahilabtann sia sa krimen.
Samtang si Joseph gindakop sang kapulisan kasunod sang pagkasapo sa bangkay. Kaso nga pagpatay ang igapasaka batok sa iya./H
