MALAWIG nga paghulat. Ginbatayan ang hulag sang senado. Ginatukbol ang senado agud nga maghulag kag aktuhan ang impeachment complaint batok sa bise presidente sang pungsod.
Naghulag ang senado. Malawig ang diskusyon. Madamo nga punto ang nabatian. Madamo nga sentimento ang ginpautwas. May singkianay sang balatyagon. May sumpakilay sang opinyon. Nangin mainit kag puno sang tensyon ang senado samtang ginatalakay ang tuhoy sa impeachment complaint.
Pareho nga nagalaum sang desisyon ang magtimbang nga hubon. Ang desisyon nagpabor sa nagapamatok kag nalugaw-an naman ang nagaduso nga mapasabat ang bise presidente.
Hinali nga narumpag ang handom sang kadamuan, ilabi na nga nagahulat-hulat sa impeachment trial, matapos nga ginbalik sang impeachment court sa House of Representative ang articles of impeachment agud nga tadlungon.
May tatlo ka reklamo na nga napasaka sadtong 2024. Indi mahimo makapasaka sang masobra sa isa ka reklamo sa sulod sang isa ka tuig.
Ika-apat nga reklamo ang nakadangat sa senado. Ginrepaso sang mga senador ang reklamo. Gintamdan nila ang Konstitusyon nga posible wala nahatagan atensyon sang mga kongresista.
Kaugalingon nga bug-at sang sini nga reklamo ang nagpausdang sa iya kabangdanan nga wala nakabutwa. Nahulog nga nakakulob sa duta.
Luyag lang athagon sang senado ang mga bagay nga nagasantu sa ginasaad sa Konstitusyon. Nakita nila nga may diperensya gani ila gindesisyunan nga ibalik sa Kamara. Indi luyag sang senado nga mangin kabahin sa reklamo nga ginpadasu-dasuan lang, nga wala marepaso sing lubos, kag ginagatungan sang handom kag ambisyon sa pulitika.
Kahibalo kita nga ang impeachment complaint isa ka pamaagi sa pulitika agud nga papason ang kasumpong. Ginahimo ini agud nga siguruhon ang paghawan sa dalan sang may handom sa matag-as nga posisyon sa gobyerno kag agud nga wala sang may mabug-at nga kasumpong nga magapili sa palaabuton nga eleksyon.
Wala man nagakahulugan nga ginbalewala na ang reklamo tungod nga ginbalik ini sa tagpadala. May higayon sa gihapon nga ini ang pagatalakayon. Importante nga matadlong ang mga bagay nga ginapatadlong sang Senado agud nga mas may kapuslanan ang pagtalakay sa sini nga reklamo.
Madamo sila sang pwede mahimo sa Kamara, madamo man sang mahimo nga tikang ang Senado angot sa sini nga impeachment complaint.
Indi naton mainsister nga ang pagtratar sini mangin kaangay sa naandan nga korte tungod ang impeachment court may pinasahi nga kinaiya nga indi mahilabtan sang hudikatura.
May kaugalingon nga patakaran, pagsulundan kag paghimo sang desisyon ang impeachment court. Indi madiktahan, indi mapahilabtan.
Indi magpaluya ang mga kongresista. May higayon nga ginhatag sa ila agud nga mas pabakuron kag mas maklaro nila ang reklamo nga ila ginpasaka sa Senado. Kon makita sang mga senador nga may punto kag wala sang diperensya santu sa kasuguan kag Konstitusyon, gilayon man ina nga aktuhan kag pagahimuan sang desisyon.
Maathag lang nga nakita sa subong kon ano kadamo ang mga senador nga nakakita sa depekto sang reklamo kag angay nga tadlungon paagi sa pagbalik sini sa mga tagreklamo.
Indi mabasol ang Senado kon nagdesisyon sila nga ibalik ang reklamo sa mga tagreklamo. Ginpanugyan man nila nga dapat tadlungon kag liwat nga ipasaka sa ila kon plastado na.
Dapat mangin maid-id kag piho ang mga Kongresista sa liwat nila nga pagpasaka sang reklamo agud nga wala sang may makita nga diperensya ang Senado.
Yara sa ila ang tanan nga higayon, ang maid-id nga pagtuon, ilabi na nga damo sila nga nagalantaw kag nagabasa sang ila reklamo. Indi nila dapat pagtugyan nga may lubos nga kumpiyansa kag ibilin nga wala na ginabasa liwat agud masiguro nga plastado kag wala sang buho nga masiplatan batok diri.
Kon nagdesisyon man ang Senado nga ibalik sa ila, dapat usisaon sang Kamara kon diin ang sayop kag pat-inan agud nga matun-an kag matadlong sa pinakamadali nga panahon.
Yara sa mga kongresista ang bola agud nga mapapag-on nila ang ila reklamo batok sa bise presidente sang pungsod.
Nakita naman nila ang numero, kahibalo na sila kon paano ang mangin dalagan sang impeachment complaint sa Senado. Napulsuhan na nila kon ano ang mangin palaabuton sang reklamo sa kamot sang mga Senador. Maathag na ang pwersa sang nagapamatok kag nagapabor sa reklamo.
Kon narumpag, angay lang nga liwat nga kumpunihon kag papag-unon, tukuran kag islan ang mga gabok nga bahin.
Ang bug-at sang kamatuoran makaparumpag sa mahuyang nga kabutigan. (bertladera@gmail.com/PN)
