NAPAMATUD-an na ang epekto. Naglinong na ang palibot. Nadula ang kabalaka. Komporme ang kadamuan sa pagpatuman sang EO #146 ni anay Mayor Jose Espinosa III.
Para sa kabug-usan nga populasyon ang katuyuan sang sini nga mandu nga dapat kutob lang alas 2:00 sang kaagahon ang pagserbe sang makahulubog nga ilimnon. Nagtuman ang kadamuan rason nga nalikawan ang pagluntad sang gamo tuga sang kahulugbon sang isa ka tawo.
Bisan sa mga istadistika sang kapulisan nagapakita ang pagnubo sang insidente nga nagaluntad sa smallville complex nga amo ang sentro sang ‘nightlife’ sang syudad sang Iloilo.
Halos wala na sang may nabatian nga kinagamo nga sa masami nagaluntad sa tunga sang oras nga alas 2:00 tubtub alas 4:00 sang kaagahon.
Napilitan sila nga mag-umpisa sa pag-inom sang temprano kag magpauli man sang temprano rason nga wala na sang may makita nga nagalagaw sa sina nga mga oras kag natapna ang posible nga pagluntad sang kinagamo.
Kahibalo kita nga ang masami nga pagtuhaw sang gamo yara sa tunga sang mga pamatan-on, nagasingki bangud sa mga sitwasyon kaangay sang pagsalapay, pagkadlaw kag pagtulok. Bangud nga hubog na, tuhay na ang paghangop sa sitwasyon sa palibot, indi makapaumod kon masalapay kag naga-isog ilabi na kon damo sang grupo nga nagapalibot.
May mga nagakaakig kon ginatulok bangud sa paghangop nga suya sa iya ang nagatulok sa iya. May yara pa gid sang akig kon makabati sang pagkinadlaw sa paghangop nga siya ang ginakadlawan sang iban.
Nagasimbog ang bugal kag kahubog rason nga nagaluntad ang singki-anay kag wala ginalauman nga kinagamo.
Ini nga mga sitwasyon ang dapat hangpon sang mga negosyante kon luyag nila nga wala sang ireklamo ang tawo sa ila pagpatigayon sang negosyo.
Dapat mangin responsable ang mga negosyante sa sini nga mga sitwasyon kag maghatag sang kaugalingon nga alternatibo ukon maathag nga solusyon agud malikawan ang pagluntad sang gamo.
Kahibalo kita nga nagareklamo sila bangud nga apektado ang ila nga negosyo, ilabi na kon bar kag restaurant nga nagaserbe sang makahulubog nga ilimnon.
Dapat paminsaron nila kon paano mabalanse ang ginansya sa negosyo kag perwisyo sa kalinong kag katawhay sang palibot.
Indi mahimo nga sa pulis isandig ang tanan bangud ang kawsa sang gamo yara sa negosyo nga ilimnan. Dapat timbangon naton nga ang tawo mahimo madisiplina depende sa ginatan-ay sang sirkumstansya.
Nagnuto na ang tanan sa pag-untat sang inom sa oras nga alas 2:00 sang kaagahon. Kon lantawon, ang tawo nga hubog sa sina nga oras wala na masyado naga-inom, laban na lang sa istorya, kag bugal lang na lang ang nabilin rason nga indi pa magpauli.
Pila ayhan ang maganar sang mga negosyante sa inom sang kustomer halin alas 2:00 tubtub sa pagbutlak sang adlaw kaysa sa ila mabenta halin alas 6:00 sang gab-i tubtub alas 2:00 sang kaagahon?
Maga-adjust ang manug-inom sa lugar nga gina-imnan kag sa oras sang pag-inom.
Mas makaginansya kon hubog na ang naga-order bangud nagamandar na lang kag nagapagusa sa iya order kaysa sa naga-order nga yara pa sa husto nga panimuot?
May datus bala kon ano ka ‘pigado’ ang pigado nga negosyo?
Kon wala, makabig lang ini nga palupad, ilabi na nga may datus ang kapulisan kon pila ka krimen ang nagaluntad. (bertladera@gmail.com/PN)
