Ngaa kabudlay magpatawad?

MASAMI lang makabati sang tinaga nga move on. Buot silingon kalimtan na ang nakaligad kag magpadayun sang pagpaglakaton sa atun kabuhi.

Masami ini nga mabati-an sa mga kabataan nga napaslawan sa paghigugma. Mga binayaan, ginluiban kag ginsakit pisikal.

Apang ini nga mga tinaga indi lang exclusive sa mga pamatan-on. Gamit man ini subong sang mga politiko nga nagdaug kontra sa ila mga kasumpong. Ugaling ang masadya kay may mga nalutos nga naka-move on, may ara man nga indi gihapon mabaton ang kalutusan.

Pero ang mas masakit, nagdaug na pero indi gihapon malipat sa dalit sang pulitika gani ginaayam pa ang mga pangontra kag kaalyado sini.

Diri sa Iloilo City Hall maathag nga wala pa natapos ang politika. Ini bangud nga padayun ang bombardiyo ni Mayor Jerry Treñas sa mga ginapatihan niya kaalyado ni anay Mayor Joe III Espinosa. Nag-umpisa sa pagpahalin sang mga job hires kag karon pagkaso sa mga kilala nga kuno maka-Joe III.

Kunsabagay kun tan-awon ang mga kaso may legalidad man nga ginasandigan si Treñas, pero ang pamangkot, wala man ayhan sang mga empliyado sang city hall nga nagkampanya sang todo sa iya?

Ang punto diri sin-o bala sa ila ni Joe III ang makasiling nga matinlo?

Indi man kita makasiling nga mas maalam gid si Treñas kontra kay Espinosa kay pareho man lang sila nga abogado. Siguro mas mais lang si Treñas kontra kay Espinosa.

Ang masakit lang diri kay ang mga nagakaipit amo ang mga empliyado nga nangabudlay agud mangin regular sa city hall. Masiling ang iban nagmaninoy lang sila sa politiko agud makasulod dira. Ang pamangkot sin-o ang wala nagpamaninoy sa pagsulod sa city hall haw? Sa bisan ano lang nga paagi sigurado gid nga may naghutik-hutik sa nagapungko nga mayor agud mapasulod ang isa ka empliyado. Ang buot ko silingon, tanan man lang sila nagapamulitika. Ugaling bentaha lang kun daug ka.

Kagab-i nakita ang isa ka empliyado nga si Rosita Camacho nga na-interview ni Presidential Spokesman Salvador Panelo sa 8888 program ni President Duterte. Ginaakusahan niya sang pagpanghingabot si Mayor Treñas.

Pamangkot sang iban, sin-o ang nagapaisog sa iya?

Pero ang sabat, ayhan indi na kita mamangkot kay ang tawo nga sa pamatyagan ginatapak-tapak na ang kinamatarong normal lang nga magpangayo bulig bisan kay sin-o lang.

Aktuhan ayhan ni Duterte ang iya reklamo? Sin-o ayhan ang nagmaninoy sa iya?

Kun aktuhan ni Duterte, sin-o naman ang mamaninoy kay Treñas?

Magarot ang politika sa Pilipinas bangud ang mga politiko indi makapatawad sang tampad. Masiling lang nga nakapatawad kag mag-abyan na sila sang kontra, apang ang matuod sina para lang sa politika. Pero indi naman tudok sa tagipusoon kag balatyagon.

Mabudlay magpatawad ang mga politiko bangud ara sila sa kalibutan sang mga kabutigan nga ang estorya lunsay palapaw lang kag pililion lang ang mapatihan.

Dapat antes kita magsiling sa iban nga move on, tan-awon ta ang atun kurason kun bala kita nakapatawad na! ([email protected]/PN)

LEAVE A REPLY

Please enter your comment!
Please enter your name here