Ngaa kinahanglan ang Traffic Discipline Zone?

DUNA na sa tawo ang makasala sa bug-os nya nga kabuhi. Ang isa ka sala mapatawad pa apang kun maathag nga sulit-sulit lang, pat-od may problema sa pagbinatasan ang natungdan.

Isa na diri ang madata nga paglapas sa mga kasuguan sa trapiko. Ang mga masami nagalapas indi lang motorista kundi pa man ang mga tawo nga nagalakat sa dalan ukon ang mga pedestrians.

Kun nagasangkad ang dalan, natalupangdan nga mas nagadamo man ang aksidente sa salakyan. Kag labaw sa tanan, masami sa gihapon gutok ang dalan.

Halimbawa na dira ang Sen. Benigno Aquino Jr. Avenue ukon ang Diversion Road nga sugod sang ginpasangkad ang dalan, mas nagdamo man ang biktima sang aksidente ukon madamo ang motorista nga naaksidente.

Bangud sini nagdesisyon ang syudad nga magpatuman sang “Traffic Discipline Zone” agud magaserbe nga modelo sang hugot nga pagpatuman sang mga traffic ordinances kag national laws.

Suno kay Mr. Jeck Conlu, head sang Public Safety and Transportation Management Office (PSTMO), may mando sa iya si Mayor Jerry Treñas nga hugot nga ipatuman ang mga kasuguan sa trapiko sa lugar sa bulig sang Land Transportation Office (LTO), Highway Patrol Group (HPG) kag Land Transportation Franchising and Regulatory Board (LTFRB). Tanan nga kasuguan gikan sa simple nga pagpapanaog kag pagpasaka sang pasahero tubtob sa kumplikado nga Anti-Distracted Driving Act ipatuman sang hugot.

Kun PSTMO ang makadakop, ordinansa ang ipatong apang ang masakit kay kun LTO ukon HPG ang makadakop, national laws ang ipatong, depende sa makita nga paglapas.  

Indi lang motorista ang sakop sang sini nga programa. Lakip man ang mga pedestrians nga indi makatoltol sang husto nga talabukan kag salakyan kag palanaugan. Normal lang nga kun diin may pasahero didto madulog ang salakyan, ukon kun diin may salakyan didto mabantay ang pasahero. Bangud sini dapat nga ipahibalo gid sa mga sumalakay kun diin magsakay kag magpanaog agud indi sila mag-away sang driver.

Ini nga mga sitwasyon nagapakita lang sang atun tanan kakulang sang disiplina. Kay kun tanan kita disiplinado, mangin normal ang dalagan sang tanan sa dalanon. Ugaling kay tanan nagadali, tanan gusto mauna sa dalan gani ang resulta…daw inukay nga subay ang karsada.

Kabay nga indi lang matapos sa pagpangdakop sa mga violators kundi sa edukasyon sang tanan nga ang kasuguan tumanon may nagabantay man ukon wala.

Sa simple nga pulong, mangin responsable kita tanan nga pumuluyo sining syudad! ([email protected]/PN)

LEAVE A REPLY

Please enter your comment!
Please enter your name here