GALIBOG gid ang ulo sang abyan naton nga si Pedro kon ngaa kinahanglan gid mapatay ang isa ka Muslim nga babaye tungod lang kay wala matabunan sing lubos sang hijab (headscarf) ang iya buhok.
Paathagan ta si Pedro parti sa pamangkot niya nga ini sandig sa aton research. Kag kon may kakulangan kita sing paghangop sa nabasahan naton angot diri, sorry po. Okey lang ini Frat Sis Sanchez? Si Sis Sanchez (sa iya Christian name) isa ka converted Muslim.
Ang ginatumod diri ni Pedro nga kaso amo ang kaso ni Masha Amini, 22 anyos, nga isa ka Kurdish Iranian. Gin-aresto siya sang morality police sa Tehran sadtong September 2022 tungod nakitaan siya sang pila ka nahot sang buhok nga nagagwa sa iya hijab.
Masubo ang iya dinangatan. Ginhunong siya sang mga ini kag nasapwan na gid lang nga nagahingalo sa kulungan kag napatay gid sa pag-abot sa ospital.
Sunu sa iya amay, may madamo nga mga pasa sa lawas ini nga sa iya pagpati tungod kay ginpatup-an siya sang hanot (police baton) bilang penalidad sa iya “inappropriate” kuno nga pagsuksok sang hijab.
Ginpanginwala ini sang gobyerno sang Iran. Napatay si Amini kuno tungod sa “heart attack”, nga wala ugaling nagpaathag kon ngaa gin-heart attack ini.
Nagdabok ini sang balatyagon sang mga kababaehan sa Iran. Nag-rally ang madamo sa ila, lakip ang pila ka kalalakihan. May naghukas sang ila hijab kag ginhaboy sa kalayo. May naggunting sang ila mga buhok. May nagasinggit sing “down with the dictator” nga tumod ang Supreme Leader nga clerico (may katupong nga posisyon sa isa ka pari sa Simbahan Kristiyano) nga si Ali Khamenei. In fact, padayon tubtub subong ang paghiwat sang mga protesta sang mga kababaehan sa Iran tungod sini.
Although, indi man subong ka-istrikto ang iban nga Muslim countries sa ila mga kababaehan tungod lain-lain man ang pag-interpretar nila sang kaundan sang Quran, ang balaan nga libro sang mga Muslim, nga amo man ang ginabasehan sang kasuguan sang pang-gobyerno sa Iran, nga isa sini amo ang pagsuk-sok sang hijab.
May naga-interpretar sang Quran sing literal kag sa makuha halin sa kabug-san (in context) sang Quran sa iban nga bahin sini kag halin man sa pagtudlo sang pila ka iman (Muslim priests) kag Quran educators.
Indi katulad sa Filipinas kag sang iban nga pungsod Kristiyano, kon diin may bulag nga kasuguan ang gobyerno sa iya sang Simbahan.
Diri, ang mayor lang nga tutok sang Simbahan amo ang kalagnon nga kabuhi sang pumuluyo. Ang gobyerno naman gapatuman sang kinamatarong sang kabug-usan nga pumuluyo sandig sa Universal Human Rights nga ginatindugan sang United Nations, nga gakilala sang patas nga kinamatarong sang tanan regardless kon ano man ang pagtuo sang kada isa.
***
Ang hijab, sunu sa Wikipedia, pwede gatabon lang sang ulo sang babaye nga Muslim. Ukon sang kabug-osan sang babaye halin sa ulo tubtub sa talapakan luas lang sa nawong kag mga kamot. Ukon lakip na ang nawong luas sa mata (labi na sa mga dalaga). Kag ina, sa nasiling ta na, depende sa kon ano ang pag-interpretar sang gobyerno sang nasulat sa Quran.
Inang pagka-istrikto sa pagpanapot sang Muslim woman ginapatuman agud mapakita nila ang “modesty”, ukon indi maiskandaloso nga panghulag, kag agud indi mangin tentasyon sa mga kalalakihan ang makita nila nga mga pribado nga bahin sang kalawasan (private parts) sang babaye, nga, of course, may pila man nga exception sa indi malikawan nga sitwasyon kag kahimtangan.
In fact, ang buhok sang Muslim woman isa sa mga “private parts” nga indi dapat ipasayang-sayang sa publiko!
Kag amo gani nga natabo ato kay Amini. Ti, ano ang matugda mo abyan Pedro? Nabulong na bala naton ang pagka-usisero mo?
Nagtango-tango si Pedro, ugaling nagsaligbat ini nga tani luyag man niya makita kon ano gid katahum ang mga dalaga nga mga Iranian nga naka-hijab tubtub sa nawong.
Indi bala “Beauty is a joy forever?” siling gani niya. “Ti, ngaa did-an sang gobyerno nga makita sa publiko ining katahum sang mga Iranian girls sa pagtuga sang Diyos agud maghatag dugang nga katahum sa kalibutan kag makahatag kalipay sa mga katauhan nga makita sila sa mga dalanon?
In fact, tugda pa ni Pedro, sa amo nga kadamo sang matahum nga Iranian maidens nga makita sa dalanon, ang makita lang sila daku na nga kalipayan sang ila pungsod. Alamagon pa sila sang mga turista nga maluyagon sa mga matahum nga talan-awon, nga makapasanyog pa sang ila turismo, indi bala?/PN
