SADTONG presidential election sang 2022, nakita na ang pagbaskug sang boto sang mga kabataan batok sa mga political dynasties kag celebrities nga, sunu sa sining mga kabataan, “wala makasolbar sang mga problema” sang pungsod.
Ginpakita pa gani ini sang mga Gen Z generation (gaedad 18-28) kag mga Millennial (gaedad 29-44) sa paghatag sang ila boto sa kay anay VP Leni Robredo bisan pa nga nalutos ini sa kabug-usan batok kay Ferdinand Marcos Jr.
Ginpalabi nila si VP Leni sa ginpakita sini nga pagka-sinsero, pagkabunayag (honest), kag pagka-resourceful sa serbisyo bisan practically wala ini matagaan sing significante nga rolyo sa administrasyon ni anay Presidente Rodrigo Duterte (2016-2022).
Sa ila pag-encuentro ni Marcos Jr. sadtong 2022 presidential election, sunu sa AI research, 60% gid sang gaedad 18-24 ang nagboto kay Robredo; mga 55% naman ang halin sa edad nga 25-34; kag natigayon pa ang 50% sang boto sang nagaedad 35-44.
Ugaling, sa kabug-usan, ginlutos siya ni Marcos Jr. sing daku halin sa boto sang mga gaedad 45 pataas. Sunu sa AI research, bangod ato sa matam-is nga “campaign messaging”, nga naglakip sang pangako nga PhP20 kada kilo nga bugas, kag sang pwersa sang “political legacy”, ukon personal nga liderato, sang mga political leaders nga may suporta pa sang mga traditional families (dynasties).
Sa indi na katingalahan nga hitabo, sang nagligad nga 2025 midterm elections nagpakita pa gid sing pagbaskug ang boto sang mga kabataan batok sa mga kandidato halin sa political dynasties kag celebrities.
Nag-resulta ini sa pagkalutos sang madamo sa ila sa lokal man kag nasyonal nga pwesto. Lakip diri nalutos ang halos katunga gid sang 12 ka mga kandidato sang Alyansa ni PBBM, samtang naghatag man sang kadalag-an sa mga kasumpong nga mga kandidato.
Sa isa ka interbyu, si Senior Research Fellow at Ateneo Policy Center Michael Henry Ll. Yusingco nagtugda nga sa 2025 midterm elections nakita dira ang pagbaskug pa gid sang boto sang mga kabataan kag ang pagsikway na nila sang madamo nga mga kandidato halin sa political dynasties kag celebrities nga “wala (ukon indi) makahatag kasolbaran sa mga problema sang pungsod”.
Ang political scientist kag retired University of the Philippines professor Clarita A. Carlos nag-welcome man sang dugang nga partipasyon sang mga kabataan sa 2025 nga eleksyon.
“The signs are good that we are reaching political maturity little by little. Voters are becoming more educated and discerning in choosing their leaders. And that’s all good,” siling niya.
Ma-imagine ko, dugang niya, nga indi na nila maagwanta ang “corruption kag “ineptitude” sang madamo nga mga lideres naton sa pungsod.
“Naniniwala ako,” siling naman ni Comelec chairman George Erwin Garcia, “that the votes of the youth matters talaga. Yung pagdagsa nilang sobrang dami… Yung boses nila, gusto talaga nilang iparinig.”
(I truly believe that the votes of the youth really matter. Their overwhelming turnout… Their voices, they genuinely wanted to be heard).”
Sunu sa data sang Comelec, sobra sa 6 sa 10 registered voters ang na-belong sa Millennial kag Gen Z generations sa sinang 2025 nga eleksyon.
Base sa ini nga Comelec data, ang mga Millennial kag Gen Z voters make up sang 60.5 percent, ukon 41,412,361 sang kabilogan nga 68,431,965 sang registered voters para sa 2025 midterm polls.
Tungod sini, galaum kita nga ining pagbaskug sang pagsikway sang mga kabataan sang mga kandidato halin sa political dynasties kag celebrities, makapabag-o man sang mga istratehiya, sugod subong, sa pag-serbisyo sang aton mga opisyales sa gobyerno padulong sa mas mabungahon nga mga kasuguan kag inisyatibo sa panghimanwa./PN
