P.4M nataban sa treasurer’s office sa Hinobaan!

Ni Cyrus M. Garde

 

Syudad sang BACOLOD – Balor P472,800 nga kantidad ang ginkawat sang wala pa makilala nga mga kawatan sa opisina sang tesorero sang banwa sang Hinobaan, Negros Occidental.

Sunu kay Mayor Ernesto Estrao, ang pagpangawat nagluntad sang nagligad nga Sabado ukon posible sang Sabado sang kaagahon.

Natukiban lamang ang insidente mga alas-tres na sang hapon sang Domingo.

Sunu pa kay Estrao, maayo lang nga wala nabuksan ang vault sang opisina sang officer-in-charge nga tesorero nga si Haydee Sicad sa diin didto natago ang mas daku pa gid nga kantidad.

Ang nasambit naman nga kantidad nga nadula igapanagtag kontani sadtong Sept. 26 para sa mga feeding programs sang 13 ka mga barangay apang bangod sa selebrasyon sang Civil Service Week, ginpaiway anay kag kahapon kontani ipatigayon.

Nalakip man sa amo nga kantidad ang inugpanuweldo sa iban nga mga empleyado.

Samtang, ang mga katapo sang Scene of the Crime Operatives sang Negros Occidental Police Provincial Office (NOPPO) nga ginapamunoan ni Police Chief Inspector Ramonit Javier nagpatigayon na sa pagkuha sang finger prints sa nasambit nga opisina.

Nahibaluan naman nga ika-apat na ini nga insidente sang pagkawat sa opisina sang mga tesorero sang local government units sang probinsya.

Ang una diri natabo sa Syudad sang Escalante sadtong Hulyo kag ginsundan sang mga insidente sa Syudad sang Bago kag banwa sang Cauayan.

Sa nasamabit nga kinawatay, wala pa gid sing nasolbar ang mga otoridad./H