CONGRATULATIONS sa mga brods kag sis sang Iloilo Sigma Rho (fraternity/Sorority) Alumni Association sa pag-selebrar sang sini lang sang ila 55th (Emerald) Anniversary.
Ginhiwat nila ini sa sulod sang tatlo ka adlaw (Sept. 21, 22, kag 23) sa isa ka otel diri sa Siyudad sang Iloilo nga todo bongga ang selebrasyon kay wala nagpabaya ang mga bros kag sis agud lubos ini mangin madinalag-on. Nag-inamutay ang tanan, mga lokal nga myembro kag ang nakabase sa luas sang pungsod.
Nagtambong diri ang madamo nga myembro sang mga Sigma Rho chapters diri sa Iloilo kag ang pila nga nakabase sa luas katulad sang Estados Unidos nga nagdalikat gid magpauli agud makatambong sa sining Emerald Anniversary nila.
Ining Iloilo Sigma Rho Alumni mga myembro man sang National Sigma Rho Oganization, nga ginapangunahan sang UP-Diliman kag UP-Los Banos. Ang una nga Presidente sini isa gani ka Ilonggo nga propesor sa UP-Los Banos, si Brod Rex Dimafelis.
In fact, ang guest of honor kag speaker nila isa ka UP-Diliman brod sa persona ni Iloilo 3rd District Congressman Lorenz Defensor. Si anay Arthur Defensor Sr. kag Gov. Arthur Defensor Jr. mga katapo man sang Sigma Rho sa UP-Diliman.
Sa ini nga okasyon, ginbotohan man nila ang bag-o nga mga opisyales sang Board of Trustees para sa 2023-2025: President – Brod Roger Lopez, Vice President – Brod Rolando Ormas, Secretary – Brod Remegio Hijalga, Treasurer – Brod Wilson Alacre, Auditor – Brod Eugene Original, kag Members of the Board nga sanday Brod Paterrno Cabangisan, Brod Evaresto Galono, Brod Francisco Hinayhinay, kag Sis Lourdes Chin.
Liwat, congratulations!
***
Indi kita sugot sa panugyan ni Senador Ronald de la Rosa, nga kuhaan liwat ang mga meyor (kag gobernador) sing poder sa mga chief of police.
Ngaa, ano bala ang problema sa ginhatag nga poder sa meyor kag gobernador sa chief of police agud kuhaon liwat ini sa ila? Indi bala malain gani ang aton experyensya sa indi paghatag sing poder sa mga meyor kag gobernador sa chief of police kag ipabilin ini sa National Police Commission, nga under sa Presidente, kag itugyan lang ini sa mga regional PNP director?
By the way, ang Napolcom gintugyanan sang 1987 Constitution kag sang RA 6975 kag RA 8551 sa pag-administer kag pag-control sang PNP, luas sa ginhatag nga supervisory power sa Presidente sa mga local executives.
Sa sini nga mga kasuguan gintagaan sang Napolcom ang meyor kag gobernador sing poder sa pagpili sang chief of police halin sa lista sang 3 ka eligible police officers nga na-rekomendar sang PNP regional director.
***
Ginsiling naton sa ibabaw nga indi dapat kuhaan liwat sang poder ang meyor kag gobernador sa chief of police. Ina tungod kon may problema kita nga yara sa poder nila ang chief of police, mas ma-problema kita kon wala sila sining poder sa chief of police.
Nakita naton ining mas daku nga problema sang panahon sang martial law kon diin kontrolado sang lubos ni anay Presidente Marcos Sr. ang mga pulis nga ginamit niya sa pagpanglagas sa mga kontra partido nga wala sing isa ka meyor ukon gobernador ang maka-reklamo.
Nakita man naton ang malain nga mga hitabo sang panahon ni Presidente Duterte nga naggamit sang iya lubos nga poder kag, despite sang nagaluntad nga mga oversight laws, nangin instrumento lang ang mga pulis sang Presidente agud mag-violar, sa luyag nila ukon indi, sang human rights sang mga suspetsado sa iya War on Drugs.
Natabo ining mga kaso sang pagpamatay kag pamintas sang kapulisan sa pagpasalig ni Presidente Duterte nga indi sila maipit sa kaso. “Tagaan ko kamo sing pardon kon matabo ina,” pasalig gani niya sadto.
Ugaling wala man siya makaluas sa mga panumbongon, labi na gid sa International Criminal Court nga nag-akusar sa iya sing Crimes against Humanity.
Tungod sini, okey lang sa aton nga ipabilin ang poder sang meyor kag gobernador sa chief of police. Basta ipatuman lang sing nagakaigu ang mga oversight functions sang komunidad paagi, por ejemplo, sa People’s Law Enforcement Board.
Ang PLEB isa ka “check and balance” nga mekanismo batok sa mga erring policemen sa reklamo sang mga pumuluyo kontra sa ila..
Luyag ko lang seguro i-suhestyon nga tani may representasyon sa PLEB ang pulis, ang partido sang Administrasyon, kag ang mayor nga partido sang Opposition agud ma-kumpleto ang oversight function sini. Kon pwede lang, ma-oversight man ang mga kaso sa Napolcom kay kon kis-a ginagamit man sila sa pamulitika kag personal nga interes sang ma-impluwensya man nga iban./PN
