PADAYUN – tinaga nga nagapakita sang pagkapositibo sang mga Filipino. Ini nagahatag sang pagsakdag kaangay sang padayun sa pagbag-o; padayun sa pag-uswag; padayun sa kadalag-an kag madamo pa.
Apang subong nga panahon sang pandemya ang tinaga nga padayun daw indi manami sa pamatin-an. Padayun…padayun lang sa pagsaka ang kaso sang COVID-19 sa atun pungsod.
Kahapon masobra sa walo ka libo ang bag-o nga mga kaso. Ini na ang pinakamataas nga narekord sang pungsod sa isa lang ka adlaw halin sang una nga natukiban ang kaso sang COVID-19 sa pungsod.
Kita ang may pinakamalawig nga lockdown nga ginapatuman sa bug-os nga kalibutan. Maluwas a nationwide lockdown nga masobra na isa ka tuig may mga ginapatuman pa nga localized lockdown, surgical lockdown kag kun anu-ano pa nga klase sang lockdown. Pila na ka bilyon ka pesos ang nautang halin sa ginahatag nga ayuda sa mga naapektuhan sang lockdown, ginpamakal sang medical equipment kag subong para naman sa bakuna.
Pero ngaa nagataas ang atun kaso kag daw wala palatandaan nga magnubo?
Ang balasulon amo ang gobyerno kag kita nga mga pumuluyo.
Una ang gobyerno. Nangin mahina ang pagsabat sang gobyerno sa problema. Halin sa umpisa indi pa makaako ang Malacañang nga problema na ang pandemya. Sa baylo nga magdihon sang mga programa, ang depensa sa mga kaalyado nga naulamid sa kontrobersiya amo ang ginahimo.
Sa pihak sang kapalpakan, si Department of Health (DOH) secretary Francisco Duque III ara gihapon sa pwesto. Wala sang maathag nga direksyon, husto lang mag-isip sang numero sang kaso kada adlaw.
Makalulooy ang local nga pamunuan nga nagamato-mato kun ano ang ila himuon. Sang nagdata na ang kaso, kaangay lang nga nagasalangisag ang gobyerno. Wala na nagakalaigo ang tawo nga ginabutang sa pwesto agud magpanguna sa away kontra pandemya.
Sa tunga sang away sa virus ang ginapaminsar amo gihapon ang politika. Sa baylo nga hatagan pagtamod ang serbisyo, ang pang-insulto sa mga nagahatag sang maayo nga panugyan amo ang ila ginahimo. Madamo sang mga ara sa gobyerno nga sila mismo nagalapas man sa pagsulondan. Maathag nga indi sila nangin maayo nga halimbawa.
Nagalala man ang sitwasyon bangud man sa atun nga mga tawo. Sa simple lang nga pagsunod sang minimum health protocols, nabudlayan kita. Halos silot na sa atun pamatyagan ang paglimit sang atun paglagaw, hugot nga mando sa pagsoksok sang facemask kag face shield kag social distancing.
Kuntani kay may kakulangan ang atun gobyerno, kita nga mga tawo mangin responsible na lang sa kaugalingon para sa atun tagsa ka proteksyon./PN
Sa sining panahon sang pandemya, kun wala kita sang may mabulig, kuntani indi na lang kita magdugang pa sang pabug-at sa atun pamunuan. Mansig na lang kita halong sang atrun kaugalingon!
