ANO MAN ang hitabu sa kalibutan, ang mga mamantala ukon media ang aton mensahero.
Kahimuan man sang tawo nga kalamidad ukon tuga sang kalibutan, ara gid ang mga media agud magpalambot sang impormasyon sa publiko.
Antes matabo ang kalamidad, antes maglala ang pandemya, ang media wala nagauntat sa pagpahibalo sa tawo kun paano maghanda.
Sa mga panahon sang diktatorya, una nga nagapasingki sang pagkamakibanwahanon nga balatyagon ang media. Ini ang kabangdanan nga ginatumod sila kag una sa lente sang mga mapintas nga rehimen.
Sa paglakat sang panahon, nagbag-o man ang kahimtangan sang pagpalayag. Nabun-ag ang Facebook kag iban pa nga social media. Dugangan pa sang kahilwayan nga mag-blog kag vlog. Bisan sin-o pwede na makapautwas sang ila painu-ino sa mga isyu.
Nabuksan ang ganhaan sa may mga talento kag ikasangkol sa pagpalayag. Ugaling ang problema kay ginhingalitan man ini sang iban agud himuon nga palangabuhian kabaylo sang kagulob-an sang iban.
Ang malawig nga dekada nga ginpangabudlayan sang media nga pangapinan hungod nga ginpadihutan agud mamusingan kag magnubo ang pagsalig sang publiko. Kun sa Ingles pa, “demonizing” the media. Mas una pa nila nga ginapatay ang mensahero bangud ang dala nga balita wala nagasanto sa ila panabor.
Bangud may palaagyan na sang ila hilway nga pagpahayag, nagapati na sila nga indi na kinahanglang ang media. Pero dira kita nagsala. Ang media magapabilin nga mabakod kag tampad sa pagpanerbisyo sa tawo nga wala sang ginalauman nga balos kundi ang simple lang nga pagtahod kag suporta.
Buligi man kami sa pagtinlo sang mga tawo nga nagapa-media-media. Kay indi sila dapat maggamit sang “badge” sang media.
Matuod may kakulangan man ukon pagpasobra ang media sa pagtalakay sang isyu. Pero ang pasalig sa inyo, ang media ara sa hanay sang matarong kag nagadampig sang mas madamo nga apektado sang isyu.
Masakit man ang mga tinaga gikan sa ila baba, daw labaha man ang igo sang ila mga tinta sa pamantalaan, ini tanan sa handum nga maamligan ang mga ginakulang kag gindalukan sang kapalaran.
Ang pagtamay indi malikawan, apang atun ibutang sa huna-huna nga ang tagsa ka hitabu may ginatunaan gani ini dapat hibaluon agud makahatag sang maalam nga panan-awan kag indi lang santo kun ano ang nabasahan kag atun nabatyagan.
Subong nga panahon sang pandemya, kinahanglan ta ang media nga nagapalayag sang mga ubay agud malikawan ang kagaw. Kinahanglan ta man ang padayun nga mga pagbalita sang hitabu agud kita tanan mangin aligmat bangud nahangpan natun ang sitwasyon.
Normal lang ang pagtamay, basta nasanto sa katarungan kag para sa kaayuhan sang kadam-an./PN
