Panginbulahan syudad sang Iloilo

ISA NAMAN ka dako nga kadalag-an ang nabaton sang syudad. Ini matapos ginkilala ang syudad sang Iloilo bilang Most Improved Highly Urbanized City sa 6th Regional Competitiveness Summit sa Philippine International Convention Center (PICC).

First place ang syudad sa Most Improved Local Government Unit, Highly Urbanized City category, sa Cities and Municipalities Competitiveness Index ukon CMCI Awards 2018.

Suno kay Mayor Jose Espinosa III significant ang award bangud gikan sa 32nd spot sang 2017, nagsaka sa 11th spot ang syudad subong nga 2018.

Pahayag sang alkalde, bunga ini sang maayo nga panggobyerno nga nagaresulta sa madasig nga delivery sang serbisyo sa publiko.

Nagpang-apat ang syudad sa government efficiency nga nagasunod sa tatlo ka mga syudad gikan sa NCR (National Capital Region) nga nagpanguna sa category.

Nagpang-11 ang syudad sa overall Most Competitive, Economic Dynamism kag Resiliency categories.

Masobra sa 1,500 ka LGUs ang nagpasakop sa CMCI awards.

Antes sini ang syudad nominee man sa pila ka mga awards kaangay sang National Literacy Awards, Galing Pook Awards kag Seal of Good Local Governance (SGLG). Nagbisita na ang mga validators agud tan-awon kun bala nagakadapat ang syudad nga magbaton sini nga mga kadungganan.

Ini nga padungog makabig man nga vindication para kay Mayor Espinosa nga ginatan-aw sang iban nga isa ka mahina kag kulang sa ikasangkol bilang alkalde.

Bisan ang mga kritiko ni Espinosa nagapangyam-id sang una sya nga nagpungko bilang alkalde matapos makakas si pwesto si anay Mayor Jed Patrick Mabilog.

Matuod nga madamo ang may duda sa ikasangkol ni Espinosa nga pamunuan ang syudad. Bisan ang mga katapo sang media may pagduda man apang sang nagpungko na ang alkalde may kaugalingon man sya nga estilo sang pagpamuno sa renda sang syudad.

Indi man masolo sang alkalde ang dungog bangud bunga man ini sang maayo nga performance sang mga department heads kag empliyado sang city government. Pero ini nagakilala man sang maayo nga liderato ni Espinosa bilang alkalde.

Kun ma-sustain ini sang syudad, pabor man para sa mga Ilonggo. Kabay nga ini nga kadalag-an kag awards magabungan sang kaayuhan sa mga serbisyo sang gobyerno kag mabatyagan mismo mga Ilonggo. (jpranco1975@gmail.com/PN)

LEAVE A REPLY

Please enter your comment!
Please enter your name here