Sa “PANIC MOOD” na subong ang pamilya Marcos sa madasig nga paglagas ni VP Leni Robredo sa mga political survey sa iya pagdalagan sa pagka-Presidente.
Sa survey sang CEAP kag Veritas Truth Survey nga naggwa sang sini lang, abanse na gani si Leni. Subong man sa survey sang OCTA Research.
Sa survey sang CEAP, gapanguna si VP Robredo by 52.57% kay anay Senador Ferdinand Marcos Jr., nga nagapangaduha kag nakaangkon lang sang 24.54%.
Sa sini nga survey, nanguna si VP Robredo sa 11 ka rehiyon kag apat lang ka rehiyon ang para kay Marcos Jr.
Nanguna man si VP Robredo sa survey sang Veritas Truth Survey, nga may 42% nga preference votes.
***
On the other hand, ang OCTA Research sa ila panalawsaw sa sentimiento sang publiko sa social media (Facebook) sadtong Pebrero 12-17, 2022, nagapanguna diri si Marcos Jr. sing 5 ka puntos batok kay VP Robredo, kon diin nakakuha lang si VP Robredo sing 38.54%, ukon 4,799,593 engagments.
However, sang masunod nga bulan sang Marso 2022 nanguna na si VP Robredo sing 5 ka puntos, nga may 8 ka milyon ka total engagments kontra kay Marcos Jr. nga may 7.5 ka milyon lang ka engagements.
Gina-predict gani sang mga data scientist sang OCTA nga sa sunod nga mga inadlaw masaka pa ang abanse ni VP Robredo kay Marcos Jr. tungod sa mga “swing votes” pabor kay VP Robredo.
***
Tungod gani sining mga ulihi nga development, nangayo na sing tabang ang Marcos family, paagi kay Senador Imee Marcos, agud mabuligan ni Presidente Duterte ang kandidatura ni Marcos Jr.
Mahimo bala ini ni Presidente Duterte? Earlier, nakapahayag si Duterte nga wala siya luyag kay Marcos Jr. nga mangin Presidente, samtang ka-tandem sini ang anak nga si Sara Duterte-Carpio nga nagadalagan sa pagka-Bise Presidente sa idalom sang partido Lakas CMD. Katapo naman si Marcos Jr. sang Federal Party.
Gintawag ni Presidente Duterte si Marcos Jr. nga “weak leader”, “spoiled brat” kag wala disiplina sa kaugalingon.
“You must be decisive (bilang Presidente),” siling gani niya sa isa ka TV interview. Dugang pa niya nga ang isa ka Presidente, “(dapat) compassionate (pro-people), and a good judge of a person… and (surprisingly) sana abogado.”
Sa mga kandidato sa pagka-Presidente duha lang ang abogado – si VP Robredo kag ang halos indi kilala nga si Jose Montemayor.
***
Samtang ginkakibut sang mga Remulla, nga mga supporters ni Marcos Jr., ang daku nga rally sang Leni-Kiko sa Gen. Trias, Cavite sadtong Marso 4. Gintambungan ini sing sobra 47,000 ka tawo.
Nga daan indi lang baluarte sang mga Remulla ang Cavite, kundi iya man ni Senador Ping Lacson nga tumandok sang Cavite.
Bisan gani ang caravan kag rally sang Marcos Jr.-Sara tandem kag sang Lacson-Sotto daw indi pa gani katupong sa rally diri nanday Leni-Kiko sadtong Marso 4.
Gani kon ano na lang nga binutig ang ginpahayag sang kampo ni Congressman Remulla. Kuno binayaran ang mga nagtambong. Ayhan? Ti, wala man sila ebidensya. Basi seguro ang mga rally sang mga Remulla ang bayaran. Man balatian na ina sang mga political dynasty, katulad nanday Remulla, nga gamitan sang sinako nga kwarta, kon indi “guns and gold”, ang ila pangkampanya.
Sa mga Ilonggo, ugaling, indi katingalahan nga dugukan sing libre sang mga pumuluyo ang rally sang isa ka palangga nga kandidato.
Testigo kita sa panahon ni anay Mayor Roding Ganzon, ang Prince of the Timawa, nga luyag gid tambungan sang mga pumuluyo bisan kapuyon pa sila sa paghulat agud magpamati lang personal kay Roding.
Natandaan ko pa ang amon iloy kag ang iban pa nga mabitbit gid sang ila pulungkuan sa rally-han agud makita lang si Roding kag makapamati sa iya pamulong-pulong nga ila gid ginakakunyagan.
So, wala kita gapati sa sining akusasyon sang mga Remulla. Balibards lang ina.
Kuno may mga komunista nga nakasimpon sa Leni-Kiko rally. Kon matuod, tani ginpadakop nila. Isa pa, kon matuod, wala man ina sila ginpang-imbitar.
Si Presidente Duterte pa gani ang nag-imbitar sadtong Marso 7 sa mga nars sang CPP-NPA agud hilway nga makabulig sa pagtatap sa mga Covid-19 patients sa aton mga ospital. Pwede man gani kuno magpabakuna ang mga CPP-NPA nga indi pagdakpon. Indi bala?/PN
