[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
TATLO KA GUYA
Madamo sang nagakakibot kon may yara sang persona nga madakpan sa buy-bust operation sang kapulisan.
Natingala bangod sa ila pagpati wala ini sang kahilabtanan, bangod sa ila pagpati nga mabuot ang ini nga persona, sa ila pagpati nga malayo ang posibilidad nga nagagamit ini sang ilegal nga droga.
Matuod, madamo sa aton ang nagakatiplang sa maskara nga ginapakita sa aton sang isa ka tawo.
Sunu sa isa ka hurubaton sang mga Hapones, ang tawo may yara sang tatlo ka nawong, ang isa niya ka nawong makita kon sia ang naga-isahanon, ang isa ka nawong ginapakita niya sa iya mga himata, kag ang isa amo ang nawong nga makita sang komunidad.
Ang tawo makilala naton sa ngalan, kon aton sia nga suod posible makilala naton ang iya personalidad apang indi naton sia lubos nga matungkad.
Bisan ang ginikanan ang indi makatungkad sa kinaiya sang iya mga anak, rason nga ang mga ginikanan ang nagakakibot sa madangatan sang ila kabataan.
Mataas ang ila paglantaw sa ila mga anak, ginatungtong nila sa pedestal, ginaamligan, ginahatag ang tanan, apang sa pihak sini, may likom ang ila anak nga wala nila ginasugid sa ila nga ginikanan.
Sa subong nga kahimtangan sang pangabuhi nga lunsay masaku ang tanan, gina-asumer sang ginikanan nga maayo man ang lakat sang ila kabataan. Ginahaum nila nga wala man sang problema kay ginahatag nila ang tanan sini nga ginapangayo, ginasuportahan sang pinansyal ang tanan nga lihok, kag ginabakal ang tanan nga kinahanglanon.
Nalipat ang ginikanan nga mas madamo sang oras nga ginahinguyang ang iya anak sa luyo sang iya mga katupong sang edad kag kon kaisa mas maimpluwensyahan pa sang mas hamtong sa iya.
Kon malayo ang balatyagon sang anak sa ginikanan, may higayon nga magatago ini sang likom bangod nga kulang sila sa koneksyon paagi sa pagsugilanon.
Tuhay ang sitwasyon nga ginahatag man sang ginikanan ang tanan sa iya anak, tuhay man ang sitwasyon nga ginahatagan sia sang tinion kag sila ang makahinun-anon.
Sa sini nga panahon, sa mga nagakatabu, lunsay kakibot ang aton mabatian, mga indi mapatihan nga sitwasyon kon ngaa ang anak imbolbado sa ilegal nga droga.
Batunon naton ang reyalidad, may mga bata nga nagalikom sa ila ginikanan, indi makita sa ila hulag kag indi mabatian sa ila pahayag nga may malain sila nga ginahimu.
Likom ang pagduso sang ilegal nga droga, likom ang pagbisyo ukon paggamit sini, bangod nga indi ini kaangay sang balut nga ginalibod ukon dulsi nga mabakal sa kilid-kilid.
Madamo nga ginikanan ang nalimbungan sa likom nga lihok sang ila kabataan. Nagakakibot kag indi makapati kon ngaa nasambod sa sitwasyon ang kurit sang ila palad.
Ang pagpadaku sa bata wala nasandig sa pagpagusa kundi sa tadlong nga paggiya. Kinahanglan naton nga suportahan ang iya kinahanglanon, apang indi naton sia pagdalukan sang tinion.
Kon mabudlay magpangita sang kinawala, mas mabudlay ang magpangita sa nagtalang sa banas nga imo kaugalingon nga bata.
Hibalua ang iya personalidad, kilalaha ang iya nga guya!/PB
[/av_textblock]
[/av_one_full]
