INDI gid kamo magpati kay vlogger/influencer nga si Euleen Castro, nga ga-“enjoy” tawgon ang kaugalingon nga Yobab (Baboy, kon baliskaron), sa iya “food review” batok sa Coffee Break.
Sa “street language”, kon tawgon ka nga “baboy”, buot silingon sina nga sobra-sobra ang imo pagkatambok (obese), nga gina-admitir niya sa pagpakita kon ano siya katambok sa iya larawan sa internet.
Peke ining panugdaon ni Yobab batok sa Coffee Break tungod “unfair” kaayo ini. Gakritikar lang nga wala man lang sang suhestyon kon paano makoreheran ang na-ekperensyahan niya nga diperensya. Nga gagwa nga “biased”.
Wala gid kuno sing “masarap” sa ginhanda nga pagkaon sini kag matab-ang ang sabor sang kape dira, samtang gapamuyayaw sa atubangan mismo sang gina-udakan niya. Grasya ang ginaatubang mo, Yobab, basi gabaan ka!
Aba, sa minilyon nga nalipay sa pagkaon dira sa Coffee Break sa sulod na sang sobra 20 ka tuig, siya pa lang ang nakasiling sina!
Amo man ina pirme ang menu nga ginahanda sang café nga ini. Nagtilaw gani si mayor kag bise mayor, kag pila ka taga-media pagkatapos sinang panugdaon ni Yobab, kag wala man sila reklamo. Gindayaw pa gani nila.
Ti, si Yobab gihapon ang patihan ta? Porque sobra tatlo ka milyon ang iya followers? Indi na! Pila na gani nga followers niya ang nag-unfollow sang iya vlog kay daw tinonto man lang ang iya ginhimo.
Gin-apinan pa gani ini sang isa ka bulay-og man nga vlogger. Siling niya wala kuno gabinutig si Yobab kay “universal”, ukon magkapareho, man ang panimpla sang tawo. So, tungod indi kauyon si Yobab sang timpla sang Coffee Break, dapat likawan man ini sang mga “potential” pa nga mga kostumer? Hoy, indi, a! Peke ina ya ang panimpla ni Yobab!
Pang-sabotahe gani ini sa iban nga cafe kag restawran sa Iloilo kag sa imahe sang siyudad sang Iloilo sa pagkilala sang UNESCO sini bilang Creative City of Gastronomy, ang “Science and Art of Good Eating”.
Tutok na kita sa kuno “universal” nga panimpla sang tawo. Sunu kanday Jason Meyers, nga associate professor of Biology and Neuroscience, kag Maura Tumulty, professor of Philosophy, indi “universal” ang panimpla sang tawo — sweet, bitter, sour, umami, kag salty – tungod indi magkapareho ang “degree of perceptive sensation” sang kada tawo. Indi gani tupong ang mga tudlo naton, indi bala?
Ina bangod kay bisan may “basic” nga panimpla ang tawo sa ila “physiological make-up”, ma-impluwensyahan pa ini sang iban nga “function” sang lawas, katulad sang aton pagpanimaho (sense of smell), kag sang ila experyensya (behavioral adaptation) sa palibut.
Sunu gani sa AI, ang mga tawo nga may “obesity” maka- experyensya sang “reduced sensitivity to certain tastes”, labi na sa matam-is kag maasin nga panimpla ukon panabor.
Bangod sini, ining “diminished sensitivity” makatulod sa ila pagkakinahanglan sang dugang nga katam-is kag mas maasin nga panabor agud matumbasan ang pareho nga panabor sang kadam-an nga indi obese.
Amo ina seguro kon ngaa wala nanamitan si Yobab sang pagkaon nga natilawan niya kag kon ngaa matab-ang ang panimpla niya sa kape kay ang ginahanda sang Coffee Break pagkadam-an nga panabor sang publiko.
In other words, “exception” ka ya Yobab, gani indi na pagdalahiga pa ang iban sa imo panimpla.
Apang kon problema ini ni Yobab, “advice” naton sa iya nga gamitan niya ang iya ginakaon sang condiments katulad sang dugang nga asin ukon toyo sa pagkaon, kag dugang nga kalamay sa iya kape.
Nga wala niya ugaling ginhimo, kag ginbasol lang ang Coffee Break samtang ang diperensya yara gali sa iya kaugalingon. Sus, a!/PN
